سامح راح قعد مع باباه ومامته ..
وحكالهم كل اللي حصل
الاب " طب وانتا رجعتلها ليه يا سامح لما انتا اصلا
بتاع بنات وملكش في الجواز "
الام " حد يقول لابنه كدا بردو يا محمد "
سامح " بابا معاه حق يا ماما وانتو عارفين كدا من
زمان بس المشكله ان ندى دي الوحيده اللي
عرفتها وطلعت محترمه وبنت ناس وكويسه .. مش زي البنات اللي بعرفهم .. دا نوع نضيف
من الاخر يعني "
الام " نوع نضيف !! ايه الكلام دا يا سامح .. دي
بنت مش بضاعه بتشتريها زي مانتا ما قلتلها .. انا مش معاك على فكره ومعاها في كل
اللي هيا عايزاه وحقها انها تسيبك تاني على فكره "
الاب " ماتكوني محضر خير يا ام سامح في ايه الله ..
"
سامح " انا مش عارف انا صح ولا غلط بس ميهمنيش
طالما معايا فلوس ميفرقش معايا المهم اني اتجوزها و بأي تمن "
الاب " هوا دا الكلام "
الام " كلام ايه وبتاع ايه انتو ازاي بتتكلمو بكل
عقلكو .. سامح اعقل البنت نضيفه ومش بتاعت فلوس .. دي مينفعش معاها الكلام دا
"
سامح " طب اعمل ايه "
الام " انتا ماسك فيها اوي كدا ليه ما تسيبها تروح
تحقق اللي نفسها فيه "
الاب " اوعى تسيبها .. طالما عايزها هجيبهالك
"
الام " هيا لعبه تجيبهالو وتوديها وقت منتا وهوا
عايزين .. ايه هوا دا ! .. سامح من الاخر كدا انا مش معاك واللي هتعملوه انا هبأه
في صفها فيه "
سامح " يا ماما انا عايز اكسبها بأي طريقه "
الام " اسمع يابنتي .. الراجل اللي يخون خطيبته او
مراته او حتى حبيبته مبيبقاش راجل في نظرها بعد كدا .. خد بالك من كلامي يا سامح
.. بلاش اللي انتا بتفكر فيه دا "
سامح " بس انا اعتذرتلها وكنت عايز نبدأ حاجه جديده
وربنا يسهلها ومغلطش واخونها تاني "
الام " سامح يابني .. انتا عارف انها مش عايزه ترجع
وانها عملت كل دا عشان تسجل البنت باسمك "
سامح بص في الارض " معاكي حق يا ماما "
الام " بص يا سامح .. انتا انك تتخلى عن لحمك ودمك
اللي هيا بنتك وانك تنكرها دا يخليها تخاف على نفسها منك ومعاها حق .. فكر يابني
كتير اوي عشان لو عايزها ترجع المرادي مهياش سهله دي مستحيله .. واوعى تكون السبب
في ضياع حلمها عشان بالشكل دا هيجي عليك يوم وهيا عايشه معاك غصب عنها هتكره نفسك
من تقييدك ليها وكرهها ليك "
سامح بص لمامتها وهيا بتقول كلامها دا وبعدين بص لباباه
لقاه ساكت ومكشر قام سابهم وقام
سامح " انا داخل الاوضه .. عن اذنكو "
ودخل على اوضته قعد عالسرير وحط راسه بين ايديه وقعد
يفكر
وبينه وبين نفسه بيقول
" طب انا اعمل ايه دلوقتي .. ماشي بنات الناس كتير
.. بس انا عايز ندى .. انا مينفعش يتقاللي لاء .. مينفعش دنا سامح !! .. ومقدرش
اتنازل واسافر يعني لو روحت هشتغل ايه ماهو بردو بالعقل .. مفيش غير انها تتنازل
مفهاش كلام دي .. بس لازم يكون في حافز ليها عشان تتنازل عشانو .. اعمل ايه اعمل
ايه عشان اخليها تتنازل .. لازم يكون في حاجه هنا تمسك فيها وتخليها ممكن تضيع
السفريه دي وفي نفس الوقت نتجوز وهيا راضيه .. يعني اعمل حاجه كبيره من الاخر ..
بس ايه هيا !! "
فضل يفكر كتير اوي معرفش يلاقي حل .. لحد ما حط دماغه
عالمخده ونام
في البيت عند ندى ..
الام " ايوا ايه الحل بأه "
الاب " بصي يابنتي .. انتي دلوقتي ادخلي نامي وانا
هكلم سامح وابوه ونتفاهم واخلصك من الجوازه دي .. "
الام " ياريييييت "
ندى " ياريت والله يا بابا .. انا بجد مش عايزه
اعيش معاه لاء وكمان اسيب حلمي عشانو "
الاب " متخافيش يابنتي انا ان شاء الله هحلها قولي
يارب انتي بس "
ندى " يارب .. يارب يا بابا يارب "
الاب خد ندى في حضنها وباسها على راسها
الاب " يلا ياحبيبتي قومي نامي انتي وميهمكيش وبلاش
دموع تاني طول منا عايش "
ندى " ربنا يديك طولت العمر انتا وماما ويخليكو ليا
يارب "
وراحت على اوضتها
كانت تعبانه جدا وبمجرد ما حطت راسها على المخده نامت
تاني يوم فات وسامح مكلمش ندى ودا اللي كانت ندى
مستغرباله وخايفه منه وفي نفس الوقت مرتاحه انه محاولش ينكد عليها يومها كالعاده
وحتى باباها مجبش سيره للموضوع وارتاحت اكتر
اليوم اللي بعدو كلمت هدى واسماء اصحابها واتفقو يطلعو
يتغدو ويقدو اليوم برا مع بعض
وفعلا اسماء عدت على هدى وعلى ندى وخدتهم وطلعو قعدو في
المطعم
في المطعم
ندى " وحشتني والله لمتنا دي يا بنات من زمان اوي
متلناش اللمه دي سوا "
هدى " ههههههه فاكره يا ندى ايام جناننا .. دلوقتي
كبرنا بس لسه من جوانا عيال "
اسماء " على رأيك والله "
هدى " مالك يا ندى حاسه في عنيكي نظرة حزن "
اسماء " فعلا يا ندى فيكي حاجه غريبه ايه الحكايه
تاني يا ندى "
ندى " عايزه احكيلكو كتيييييير اوي بس مش عارفه
اقول ايه ولا ايه .. انا جوايا كتير اوي والله وتعبت خلاص فاض بيا .. حاسه ان حلمي
هيضيع من ايدي وانا بتفرج عليه وببتسم "
اسماء " بعيد الشر ليه كدا بس "
هدى " ياااااااااه كل دا ياحبيبتي .. اهدي كدا
واحكيلنا زي ما دايما اتعودنا نشكي لبعض .. في ايه حصل جديد بعد انكو رجعتو "
ندى " على اد مانا فرحانه ان البنت اتسجلت باسمه
ولحقتها من انها تضيع .. على اد منا ندماااااانه اني رجعتلو "
اسماء " ويعني يا ندى كان في ايدك حل تاني وقلتي
لاء وبعدين دي حاجه عند ربنا تحتسبيها وكلنا قلنالك متعمليش كدا وانتي اللي اصريتي
.. "
هدى " بلاش نعاتب بس وخلينا نفهم ايه الجديد بعد
الرجوع "
ندى بصت لهدى واسماء وبدأت تحكيلهم
اسماء وهدى بصو لبعض وهما مش مصدقين اللي بيتقال ..
اسماء " اسمعي يا ندى انتي لازم تنفصلي عنه وفي
اسرع وقت "
هدى " بالظبط .. اوعي تستني مع واحد عايز يدمرلك
حياتك يا ندى "
ندى " هوا دا اللي انا عايزه اعمله ويا انا يا هوا
لاني خلاااااااص فاض بيا "
اسماء " لاء ولسه .. دا لو فعلا بأه جوزك هيوريكي
نجوم الليل في عز الضهر زي ما بيقولو "
ندى " انتي رأيك كدا "
اسماء " طبعا يا بنتي ! انتي مش شايفه بيعمل ايه
وعمل ايه ودا كلو وانتو اسمكو حيالله مخطوبين "
هدى " نصيحه مني يا ندى .. اوعي تكملي المشوار دا
مهما كان التمن "
ندى بصتلهم هما الاتنين وسرحت في كلامهم
خلصو اكل واتمشو شويه بعربية اسماء وروحو
ندى روحت وحست انها مش عايزه تتكلم مع حد دخلت على
اوضتها على طول وقعدت عالسرير تاني تفكر
وفجأه سمعت صوت جرس الباب برا بيرن
قلبها حست انه واجعها وبينبض جامد
وشويه ودخلت مامتها عليها
" ندى "
" نعم يا ماما "
" عمك محمد وسامح برا وباباكي قاللي اقولك تيجي
تحضري القعده عشان تقولي اللي انتي عايزاه وهوا جنبك "
ندى بصت لمامتها بنظرة استنجاد وبلعت ريقها .. مامتها
حست بيها وراحت خدتها في حضنها
" متخافيش يا حبيبة ماما الموضوع هيعدي ان شاء الله
وهيبأه تمام بابا معاكي ومش هيسيبك "
" ربنا يستر يا ماما "
" يلا حبيبتي البسي واطلعي "
" حاضر "
وطلعت مامتها من الاوضه وندى لبست وطلعت لقت سامح وباباه
برا
ندى " سلام عليكم "
الكل " وعليكم السلام "
والد ندى " تعالي يابنتي "
وراحت ندى قعدت جنب باباها كأنها بتقوللو احميني ..
باباها طبطب بالراحه على ايدها وكأنو بيقولها متخافيش
انا معاكي
والد سامح " عامله ايه يا ندى "
ندى " الحمدلله "
والد سامح " وشك اصفر كدا ليه .. شكلك مبتاكليش
والشغل مأثر عليكي بتاع المعرض "
ندى " والله ما في حاجه مريحاني دلوقتي يا عمو الا
الشغل دا لو عايز الصراحه يعني "
والد سامح " اا .. ندى احنا جايين انا وسامح نحاول
نصلح اي حاجه نقدر نصلحها "
ندى " هه !! حضرتك شايف انو ايه اللي انكسر عشان
يتصلح! وهوا في حاجه بتنكسر بتتصلح؟ مهما كان وحاولنا نصلحها عمرها ما هتكون زي
الاول ابدا "
سامح " ارجوكي يا ندى اسمعيني "
ندى " اسمع ايه تاني .. اسمع ان انا بضاعه بتشتريها
بفلوسك .. الا انا يا سامح .. الا انا ... مش انا اللي باجي بالفلوس "
والد سامح " احنا عارفين دا يابنتي ودي حاجه مفروغ
منها بس هيا كانت يعني .. زلة لسان "
ندى بصت لباباها وهوا حس من نظرتها انها مش عايزه ترد
وبتقولو رد انتا يا بابا
والد ندى " زلة لسان في ايه ولا في ايه ولا في ايه
.. محمد انا بنتي غاليه اوي عليا وانتا عارف كدا كويس من اول يوم اتكلمنا فيه في
الموضوع دا واحنا خالصين من الكلام دا .. وانا سكتت على حقها كتير اوي بس مش هسكت
تاني "
والد سامح " طب يعني يرضيك الناس تقول ايه بعد فسخ
الخطوبه مرتين .. اكيد سمعة بنتك اهم عندك من اي حاجه "
والد ندى اتعصب وقام من مكانه
والد ندى بنرفزه وعصبيه وصوت عالي " انا بنتي
سمعتها انضف من اي حاجه في الدنيا يا محمد "
ندى " اهدى يا بابا "
سامح " اهدى يا عمي بابا مش دا قصدو والله "
والد ندى رجع قعد عالكرسي تاني وهوا من جواه في نار
طالعه ..
والد سامح بكل برود " انا مش قصدي كدا ياصاحبي ..
انا قصدي ان محدش يقعد يسأل ليه الخطوبه اتفسخت وهيا شكلها ميبقاش وحش "
والج ندى جه يرد قامت ندى مسكت على ايده جامد
ندى " يرضيك يا عمي اعيش معاه طول عمري وانا مش
عايزه .. عشان خايفه من ان شكلي ميبقاش حلو ... عن نفسي شايفه اني ارضى الناس كلها
تتكلم وتقول خطوبتها اتفسخت .. بس انا مرجعش اعيش مع سامح تاني "
والد سامح " دا رد نهائي يا ندى "
ندى " اه "
سامح " ندى انا بستسمحك ترجعي "
ندى " وقراري الاخير اني مرجعش .. "
ومسكت الدبله من ايديها واللي هيا اصلا كانت ماسكاها مش
لابساها وحطتها على التربيزه قدامهم
ندى " واهي الدبله لتاني واخر مره يا سامح "
سامح " ماشي يا ندى .. بس مسير الايام تجمعنا ..
يلا يا بابا "
والد سامح " يلا يابني "
ومشيو من غير حتى السلام ..
اول لما مشيو ندى حست انها مرتاحه اوي ومبسوطه .. وكأن
هم كبير اوي انزاح من على قلبها
بصت لباباها وحضنته
ومامتها جت من جوا
ندى " اااااااااااااه اد ايه انا فرحانه ومرتاحه
الحمدلله ياااااااااارب "
الام " مبروك يابنتي الف مبروك .. الحمدلله "
ندى " الله يبارك فيكي يا ماما .. مالك يا بابا في
ايه "
الاب " قلقان "
ندى " قلقان!! من ايه يا بابا "
ليست هناك تعليقات:
إرسال تعليق