الاثنين، 6 أغسطس 2012

قصة مجرد حلم الحلقه 13



الاب " مش عارف والله يا ندى بس مش عارف ليه كمان مش مرتاح "
الام " ليه هوا ايه حصل عشان تكون مش مرتاح "
ندى " مفيش يا ماما عادي سامح وتهديداته .. اهو كلام وخلاص "
الاب " لا يا ندى انا بقولك اني مش مرتاح .. عشان خاطري يابنتي خدي بالك من نفسك وحرصي عليها اوي "
ندى " حاضر يا بابا .. ربنا يخليك ليا .. انا داخله الاوضه بأه مع نفسي "
وسابتهم ودخلت

فاتت الايام وقرب يخلص الشهر وكانت ندى خلاص بتحضر كل حاجه عشان تسافر
وفي يوم قبل السفر باسبوع
ندى كانت قاعده في الاوضه بترسم من جديد
دخل عليها باباها
" ندى "
" بابا؟ تعالى اتفضل "
الاب دخل وقفل الباب وراه
وقعد جنب ندى عالسرير
" ايوا يا بابا "
" بتعملي ايه "
" برسم "
" وريني كدا "
ومسك منها الرسومات واتفرج عليهم
" طبعا كالعاده هايله يا حبيبتي .. ندى عايزك في موضوع "
" اتفضل "
" انا بكرا مسافر "
" مسافر !! فين وليه "
" مفيش محمد وواحد تاني صاحبنا من ايام زمان عايزين يروحو مرسى يومين ف هنزل معاهم "
" انكل محمد تاني يا بابا "
" لا يا ندى دا بعيد عن اي حاجه .. عمتن انا جيت اسلم عليكي قبل ما اسافر لاني مسافر عالفجر "
" طيب يا بابا خد بالك من نفسك تروح وتيجي بالسلامه "
" الله يسلمك ياحبيبتي مش عايزه حاجه من هناك "
" سلامتك وبس "
باباها باسها على راسها وقام فتح الباب
" تصبحي على خير "
" وانتا من اهل الخير يا بابا "
وطلع باباها من الاوضه وهوا مطمن وندى ابتسمت وغمضت عنيها وحطت دماغها على السرير نامت وجنبها رسوماتها

تاني يوم صحيت على صريخ برا الاوضه قامت تجري مخضوضه
" ماما؟ في ايه بتصرخي ليه .. يا ماما .. ماما ردي عليا في اييييييييه "
ومامتها مسمتمره في الصراخ وبصت لندى
" ابوكي يا ندى ابووووووووكي "
" مالو بابا يا ماما متجننينيش ابوس ايدك "
" ابوكي ماااااااااااااااااااااااات "

ندى بصتلها وبرقت وكأنها مسمعتش
فضلت باصه لمامتها وهيا بتصرخ ودموعها على خدها ومش مصدقه اللي سمعته
مش مستوعبه اللي بيحصل
بصت على ايديها وحطت ايدها على ايدها التانيه ومشتها عليها وكل دا في ذهول
وحست بايدها ماشيه على ايدها التانيه
وبدأت تكلم نفسها بصوت واطي
" هه! يعني انا مش بحلم مش كدا .. انا اهو حاسه بلمست ايدي على ايدي التانيه
لالا محصلش .. ماهو اصل مينفعش .. طب ازاي .. ازاي .. ها؟ ازاي؟ "
وبصت لمامتها لقتها لسه بتصرخ والباب من كتر الخبط عليه اتفتح والجيران اتلمو حواليها يهدوها
وندى كل دا باصه عليهم وفاتحه بؤها ومخها تقريبا واقف مش شغال مش فاهمه اللي بيحصل
فضلت تبص حواليها وحطت ايدها على راسها
" بسسسسسسسسسسسسسسسسس .. بس مش عايزه اسمع صوت بسسسسسسسسس .. بسسسس بابا مامتش محدش يقول مااااااااااااات .. بابا عايش بابا موجوووووووووووووووود "
مامتها اول لما شافتها بالمنظر دا جريت عليها وحضنتها وفضلت تعيط وندى بتصرخ في حضنها
" ماما .. ماما بابا مامتش .. ونبي قوليلي مامتش ها؟ بابا مامتش يا ماما .. قولييييييييييلي بابا مامتششششششششش "
" بس يا ندى بأه بسسسسسس .. بس يابنتي ابوكي مات في حادثه وهما رايحين .. التلاته راحو مننا "
" ااااااااااااااااااااااااااااااااااااااااااااااااااه "

فاتت ساعات طويله اوي ندى مكنتش حاسه فيها غير بوجع في قلبها وبس
خلصت ساعات الجنازه والدفنه وايام الجنازه .. كل دا ندى نايمه عالسرير وعنيها مفتوحه ودموعها مبتوقفش ومن غير صوت
واسماء وهدى جنبها في اوضتها وماسكين ايديها
بيحاولو يكلموها وهيا شبه مغيبه عن الوعي بس فاتحه عنيها ودموعها مش راضيه توقف
اسماء " وبعدين يا هدى .. انا خايفه عليها اوي .. "
هدى " مش عارفه والله .. انا كمان خايفه اوي وحتى انا مش متخيله ولا قادره ابطل عياط ..
عمو كان بالنسبالي زي بابا "
اسماء " ولا انا يا هدى .. ولا انا والله .. الله يرحمو ويصبرنا ياااااارب "
هدى " يارب "

وشويه ودخلت مامت ندى
الام " عامله ايه يا بنات "
اسماء " لسه يا طنط زي ما هيا "
الام " سامح ومامته عايزين يشوفوها "
هدى " ما بلاش يا طنط هيا مش ناقصه وبعدين هما مش عندهم عزا هما كمان "
الام " ما هما خلصو الـ 3 ايام وجايين يشوفوها لما عرفو انها تعبانه "
اسماء " طيب يا طنط لو حضرتك  شايفه انه عادي خلاص دخليهم "
هدى " انا خايفه بس انها تزعل لو شافتهم "
الام " يا ندى .. ندى .. يابنتي ونبي ردي عليا متوجعيش قلبي اكتر منا .. طب حتى شاوريلي بإيدك هزيلي راسك اعملي اي حاجه بس اطمن عليكي .. "
وكل دا وندى مفيش منها اي استجابه غير انها نايمه وفاتحه عنيها ودموعها بردو على خدها
هدى " وبعدين يا طنط "
الام " والله يابنتي ما عارفه .. "
هدى " خلاص دخليهم وانا واسماء هنطلع لحد ما يطلعو ونرجع نقعد معاها تاني "
الام " لا يابنتي كفايه عليكو انتو كل يوم عندها تعب عليكو دا "
اسماء " كدا بردو ياطنط "
هدى " ايه يا طنط اللي حضرتك بتقوليه دا هوا مش احنا اخواتها بردو "
الام " ربنا يكرمكو ياحبايبي .. اروح اندهلهم انا بأه "
اسماء وهدى " اتفضلي "

طلعت مامت ندى وطلعت وراها اسماء وهدى قعدو في الصاله ودخلت تاني مامت ندى عليها الاوضه
ومعاها سامح ومامته
اول لما دخلو سامح بص على ندى صعبت عليه شكلها اوي ..
بصلها وفضل باصص عليها ومش قادر يشيل عنيه من عليها

ام ندى " اتفضلو اقعدو "
ام سامح " شكرا "
سامح وهوا باصص بردو على ندى " هيا كل دا بنفس المنظر كدا؟ "
ام ندى " اه والله يابني .. زي ماهيا من لما عرفت الخبر "
سامح " وبعدين يا ندى؟ قومي اصحي ماحنا كلنا اتحطينا في الموقف دا ..
والله انا جوايا بردو مكسور بس هنعمل ايه .. دا قضاء ربنا وقدره "
ام ندى " قولها يابني ونبي .. انا تعبت من الكلام معاها "
سامح " ندى ردي عليا "
ام سامح " يابنتي ربنا يهديكي ردي علينا احنا مش عايزين غير انك تفوقي وبس "
ولسه مامت ندى هتتكلم موبايل ندى رن
مامت ندى قامت مسكت الموبايل وبصت فيه لقت رقم غريب
ام ندى " عن اذنكو ارد بس عالموبايل معلش "
ام سامح " اه اتفضلي حضرتك "

وطلعت مامت ندى من الاوضه وكانت هدى واسماء قاعدين بيتكلمو
اسماء " خير يا طنط في حاجه "
ام ندى " موبايل ندى بيرن رقم غريب ثواني ارد "
اسماء " اه اتفضلي حضرتك "
سكت الموبايل ورجع رن تاني
" الو "
" سلام عليكم "
" اهلا وعليكم السلام مين معايا "
" هوا دا مش رقم الانسه ندى "
" اه حضرتك بس انا مامتها ندى تعبانه شويه "
" لا الف سلامه عليها .. انا دكتور عماد اللي قلتلها على المعرض واللي قلتلها على المنحه .. ايه الاخبار السفر خلاص بعد كام يوم "
" ااا .. اا .. مش عارفه اقول لحضرتك ايه "
" خير يا مدام في ايه "
" والد ندى توفى من كام يوم "

ليست هناك تعليقات:

إرسال تعليق