اسماء " انا هفهمك "
ندى " ايوا ؟ "
اسماء " من الاخر كدا انا شاكه ان سامح جالك عشان يرجعلك بيبينلك الوش الحنين عشان تحنيلو وتقلبي ترجعيله وخصوصا انك قفلتي باب السفر "
ندى " دا بعينه "
هدى " ماشي يا ستي بس بردو هوا ناوي على كدا .. "
اسماء " وانا بصراحه شايفه ان عماد مناسب ليكي اوي باين عليه مهتم بيكي وبحلمك واهو زي القمر اهو ويلحقك قبل ما سامح يرجعلك اهو حتى نقول لاء دي مخطوبه خلاص ومبقتش تنفعلك تاني "
ندى " انتو بتقولو ايه .. لاء طبعا .. لاء يعني لاء "
مامت ندى وهيا جايه من المطبخ بالاكل " ايه هوا اللي لاء يا ندى "
ندى " اااا .. لا مفيش يا ماما "
اسماء " لاء في يا طنط تعالي احضرينا "
ندى " بطلي بأه يا اسماء تحضرنا ف ايه انتو بتتخيلو حاجات مش هتحصل "
الام " طب ماتفهومني يا بنات "
هدى " بصي يا طنط احنا شايفين ان سامح ناوي يرجع لندى تاني "
اسماء " وعشان كدا عايزين نخلي ندى وعماد يرتبطو ونخلص من سامح بأه "
الام " عمااااد؟ مع ندى؟ "
ندى " ماما لاء يعني لاء يا ماما انا مش موافقه مستحيل طبعا "
الام " طب اهدي بس يعني هما مش بيفكرو غير لمصلحتك يابنتي "
ندى " انا عارفه طبعا بس يا ماما انا مبفكرش ابدا في كدا ولا حتى هوا "
اسماء " خلاص ياحبيبتي اللي تشوفيه احنا بس كنا بنفكر وقلنا نشوف رأيك عشانك والله مش عشان حاجه "
هدى " متزعليش مننا بس يا ندى "
ندى " ابدا مش زعلانه منكو يا هدى وعارفه انو دا عشاني يا اسماء بس انا مش بفكر في كدا ولا عايزه وهعرف اتصرف مع اللي اسمو سامح دا كويس اوي دا لو فضلت هنا في مصر مسافرتش .. لما افكر بأه مع نفسي واشوف انا ناويه على ايه اصلا "
الام " خلاص ياحبيبتي يلا كلي وقومي ارتاحي وكملي نوم ومتفكريش في حاجه والصباح رباح "
ندى " حاضر يا ماما "
قعدت ندى تاكل وخلصت اكل واستأذنتهم انها تدخل تريح جسمها واسماء وهدى قالو انهم هيروحو بيوتهم وبكرا هيروحو يزورو والد ندى معاها هيا وعماد الصبح
دخلت ندى على اوضتها وقفلت الباب وراها وراحت نامت على سريرها وبصت على الكرسي اللي جنب السرير بتاعها وافتكرت عماد لما جه وقعد وقومها معاه بكلامه وقدر يخليها تصحصح وتفوق وتفكر كمان انها تحلم من تاني
عالاقل عشان باباها يفرح بيها وتحقق اللي كان نفسه يشوفها عليه
" اااااه يا بابا الله يرحمك .. وحشتني اوي .. فين ايام لما كنت بجري على حضنك واتكلم معاك .. ايوا انتا يوم ما جتلي تقوللي انك مسافر كان باين على شكلك انك قلقان .. بس انا متخيلتش انه ممكن يبأه دا ممكن يحصل .. ازاي سبتني ومشيت يا بابا .. ياااارب .. ارحمه يارب واجعل مثواه الجنه وخليني اشوفو هناك .. نفسي اشوفو يارب .. نفسي افرحه في قبره ... ربنا يرحمك يا بابا .. "
وغمضت عنيها وبدأت تفتكر كل مواقفها مع باباها .. ودموعها بتنزل على خدها
وفجأه افتكرت كلام عماد وانها لازم تعمل اللي باباها كان نفسه تعمله وفتحت عنيها من تاني
" طب ما فعلا معاك حق ياعماد .. بابا كان فرحان بيا اوي ورافع راسه برسوماتي والفن بتاعي
كان نفسه يشوفني فنانه كبيره ومشهوره .. كان نفسه احقق حلمي عشاني انا مش عشان هوا عايز يفرض عليا كدا
وهوا دا اللي انا هعمله .. لازم احقق حلمه بس ازاي اسافر واسيب ماما هنا لوحدها .. دا يبأه مستحيل مش هيحصل ابدا
اممممم طب اعمل ايه .. مفيش غير اني اعرض عليها تسافر معايا ونستقر كمان هناك .. ايوا وماله دا حتى ياريت وابعد بأه عن سامح
واللي بيفكرني بأي حاجه من زمان .. مش هقدر انا اصل اكمل في البيت دا وبابا مش فيه ...
خلاص انا اكلم ماما في الموضوع دا واشوف هتقوللي ايه .. وياااارب يا ماما توافقي .. عشان خاطر بابا حتى وبس "
وهيا بتكلم نفسها راحت في النوم ..
لحد تاني يوم .. صحيت على صوت موبايلها
بصت لقت عماد
" الو "
" صباح الخير "
" صباح النور اهلا يا عماد "
" ازيك يا ندى عامله ايه انهردا "
" احسن الحمدلله "
" طيب يلا عشان نروح نزور بابا "
" دلوقتي "
" ااه "
" طيب حاضر هقوم البس واكلم اسماء وهدى ونروح ان شاء الله "
" خلاص وانا مستني اول لما تخلصو كلميني "
" حاضر .. على فكره ماما مش جايه معانا "
" ايه دا ليه كدا "
" اصل احنا نسينا خالص موضوع انها مينفعش تنكشف على رجاله لحد اربعين يوم من وفاة بابا الله يرحمه ولا تنزل من البيت "
" يااااااااااااااه ايه دا ازاي فاتتنا دي "
" معلش ربنا يسامحنا "
" ان شاء الله خلاص مش مشكله نروح لوحدنا "
" ماشي انا هقوم اهو "
" وانا مستني "
وقفلو مع بعض وقامت ندى طلعت من اوضتها غسلت وشها ودخلت مسكت موبايلها وكلمت اسماء وهدى صحتهم وراحت تلبس
خلصت لبس وطلعت ملقتش مامتها في الصاله ومقدرتش تدخل الاوضه ومتلقاش باباها موجود قامت كتبت ورقه بتقول فيها انها نزلت وسابتها تحت باب اوضة مامتها ونزلت
اول لما نزلت كانت اسماء مستنياها بعربيتها دخلت العربيه وسلمت على اسماء ومسكت موبايلها اتصلت بعماد
" الو ايوا يا عماد "
" ها يا ندى ايه نظامك "
" انا اهو نزلت انا واسماء في عربيتها رايحين نعدي ناخد هدى ونطلع عالمقابر "
" طيب ماشي اقابلكو هناك ان شاء الله "
" معاك عربيتك ولا نعدي عليك "
" لاء عربيتي موجوده .. "
" خلاص ماشي نتقابل هناك "
" ان شاء الله "
قفلت معاه وراحو خدو هدى وراحو محل ورد ندى جابت ورد وطلعو عالمقابر ولقو عربيه واقفه
نزلو من العربيه ولقت عماد بينزل من العربيه اللي واقفه سلم عليهم ودخلو كلهم على قبر والد ندى
وقفو سلمو عليه وقرولو الفاتحه وندى حطت الورد وقعدت قدام القبر
" وحشتني يا بابا اوي .. كان نفسي تبأه معايا وتشوفني وانا بكبر ..
كان نفسي اوي يقولولك يا ابو الفنانه المشهوره ندى وترفع راسك قدام الناس كلها بيا
كان نفسي اترمي في حضنك دلوقتي عشان اسافر احقق حلمي وحلمكو
رحت وسبتني يا بابا .. كدا بردو؟ اهون عليك؟ نفسي اشوفك .. مش قادره اعيش في البيت من غيرك
حسك في البيت كان ليه طعم تاني .. انا محرمه على نفسي يا بابا اقرب ناحية اوضتك انتا وماما
مانا اصلي مقدرش ادخل ومش القاك جوا .. ماما بتسلم عليك .. هيا كان نفسها تيجي تشوفك معايا
بس لسه مخلصتش الاربعين .. انا مكنتش عايشه يا بابا من ساعة ما عرفت
بس عماد هوا اللي جلاني افوق للدنيا وقاللي اعمل اللي انتا عايز تشوفني عليه
وانا هعمل كدا فعلا متخفش عليا .. انا هبأه كويسه بس انتا دايما خليك معايا .. تعلالي في الحلم يا بابا
خليني دايما اشوفك عشان انتا عارف انك وانتا مش موجود انا ببأه خايفه
بابا انا بحبك اوي .. وعارفه اد ايه بتحبني .. ياريت لو كان بإيدي اترمي دلوقتي في حضنك
ااااااااااااااااه يا بابا ااااااااه اد ايييييييييييييييييه وحشتني "
كل دا وكانت بتتكلم بصوت مبحوح من كتر العياط لما اسماء وعماد وهدى شافو منظرها وهيا بتتأوه
شالوها من عالارض وقالولها يلا
ندى " سيبوني مع بابا وامشو انتو انا مش عايزه اسيبو لوحدو "
عماد " ندى باباكي عند ربنا يعني عند اللي احسن مني ومنك ومن الدنيا دي كلها "
ندى " بس هوا وحشني "
اسماء " معلش يا حبيبتي هوا دلوقتي شايفك وانتي بدموعك دي بتعذبيه مانتي عارفه انه مبيحبش يشوف دموع دلوعته حبيبته "
ندى " طب مانتو اهو دموعكو نازله عليه "
هدى " والله منظرك تعبنا كلنا يا ندى وعمو بردو كان غالي علينا وكان أب لينا احنا كمان .. الله يرحمو يارب "
ندى " ااااااااه .. ياااااااارب "
وخدوها سندوها هدى من ناحيه واسماء من ناحيه وعماد كان ماشي وراهم لحد العربيات
ولما وصلو عند العربيات
عماد " ندى انتي كويسه "
ندى " انا عايزه اروح دلوقتي حالا روحوني ارجوكو "
اسماء " حاضر .. حاضر يا ندى حالا هنروحك "
وهدى دخلت ندى العربيه
وفضلت اسماء وعماد
" طيب يا اسماء خدو بالكو منها وانا هبأه اطمن عليها اول بأول ان شاء الله ربنا يصبرها "
" شكرا يا عماد تعبناك معانا "
" ابدا والله مفيش الكلام دا كلنا لها ودا واجب عليا "
" دا العشم بردو "
" طيب يلا يا اسماء روحي عشان تروحيها عشان متبقاش متدايقه وهيا قاعده بس "
" خلاص حاضر عن اذنك "
" اتفضلي "
وركبت اسماء العربيه واتحركو وركب عماد عربيته وروح على بيته
ليست هناك تعليقات:
إرسال تعليق