" حلمت بسامي "
مجدي بصلها وضيق عنيه شويه ..
استغرب !
" حلمتي بايه ياحبيبتي؟ هوا كويس؟
بيقولو الحلم بالميت حق "
" حلمت انو واقف بيكلمني وبيقولي انا
فرحت اوي بالورد وابأو تعالو اقعدو معايا كل فتره عشان اتونست بيكو
ومتبعديش عن بابا هوا بيحبك وباسني وفجأه
ملقتوش فضلت انده عليه واعيط لحد ما صحيت "
مجدي خدها في حضنو وطبطب عليها وباسها على
راسها
فضل يهدي فيها واقنعها تنزل تفطر معاه قبل ما
يروح شغلو
كانت سماح كالعاده محضرالو الفطار ..
لما لقت سمر راحت بسرعه عملتلها العصير
بتاعها وعملتلها سندوتشين وجابتهوملها
" سمر؟ "
" نعم ياسماح "
" مالك شكلك معيط "
" حلمت بسامي الله يرحمو "
" ياحبيبي .. وهوا كويس؟ مبسوط؟ "
" كان شكلو جميل .. ربنا يرحمو ياسماح
"
" امين يارب ياحبيبتي .. متزعليش نفسك
دا راح للي احسن مني ومنك "
" ونعم بالله .. "
ومشيت سماح ع اوضتها
ع الفطار
" بقولك ايه ياسمر "
" نعم يا بابا "
" تيجي معايا انهردا وانا بشوف الشقه؟
"
" هيا ميار مش جايه معاك "
" انا عايز الشقه على زوق بنتي حبيبتي
.. انتي وراكي حاجه انهردا ؟ "
" مفيش عندي بس مشوار كدا مع صحابي
وبليل عندي تنس هكنسلو "
" ابأي قوليلي حبيبتي كل يوم بليل تاني
يوم عندك ايه عشان ابأه عارف دنيتك ماشيه ازاي "
" حاضر يا بابا "
" طيب والتنس ليه هتلغيه "
" مش عايزه اكمل "
" ليه "
" عشان بيفكرني بسامي الله يرحمو وهوا
اللي كان بيشجعني عليه "
" بالعكس لازم تعملي الحاجه اللي كان
بيحبك تعمليها "
" هوا كان بيجي معايا انا مش هروح من
غيرو "
" طب ولو قولتلك اجي معاكي انا ايه رأيك؟
"
سمر لا اراديا ابتسمت وباسته على خده لاول
مره
فرح اوي مجدي بالحركه دي .. وحس انه اخيرا
بنته قربت منه
خلصو فطار واتفقو انهم بكرا يشوفو الشقه
وانهردا يروحو التدريب بتاع التنس
مجدي لقى نفسه اتأخر ع الشغل سابلها فلوس
وباسها ع راسها ومشي ..
بصت عليه بابتسامه وهوا طالع وحست انها
مبسوطه اوي بعد ما قالها انو هيروح معاها
دي اول مره يهتم بحاجه تخصها اصلا ..
طلعت اوضتها مسكت الموبايل وكلمت ماجي
" الو صباح الخير "
" صباح النور يا سمر "
" قومي يلا عشان ننزل مش كنتو عايزني
"
" ااه صح .. هوا الساعه كام "
" داخله ع التسعه "
" طب يلا ماشي .. هنحضر محاضرة انهردا؟
"
" مش عارفه .. قومي بس انتي وانجزي
ونشوف الحوار دا .. هعدي عليكي كمان ساعه تكوني جاهزه "
" ماشي باي باي "
" سلام "
قفلو سوا وقامت سمر تلبس
خلصت لبس وجهزت ونزلت ركبت العربيه ولسه بتتحرك لقت موبايلها بيرن
مسكته لقت ادم بيتصل ..
استغربت اوي من المكالمه الغريبه دي لان ادم
مش بيتصل غير كل فين وفيييييييين مره بالصدفه اذا في حاجه
وهيا عارفه انه بيعمل كدا عشان ميزعجهاش
وعشان محترم انها مرتبطه حتى لو هما صحاب
ردت بكل هدوء وهيا بتتحرك بالعربيه
" الو "
" صباح الخير يا سمر ازيك "
" انا تمام الحمدلله انتا عامل ايه
"
" انا كويس الحمدلله .. انا اسف والله
بس محمد لسه قايلي .. البقاء لله "
" ونعم بالله مرسي جدا يا ادم "
" على ايه دا اقل واجب اصلا .. عندنا
محاضره انهردا مش هتحضري؟ "
" انا رايحه الجامعه انهردا بس مش عارفه
لسه هحضر ولا لاء "
" طيب عموما انا ومحمد وعصام موجودين
اشطه "
" خلاص ماشي اشوفكو "
" تمام خدي بالك من نفسك لا اله الا
الله "
" محمد رسول الله "
قفلت معاه وكملت سواقه لحد ما وصلت لبيت ماجي
ولقتها تحت مستنياها
ركبت معاها وسلمو على بعض
" انا كلمت بيتر وهيقابلنا في الجامعه
"
" خلاص ماشي "
" مالك انتي وهوا ايه حكايتكو "
" لا حكايه ولا بتاع الموضوع كلو اني
متدايقه من بعد سامي الله يرحمو "
" وعامله ايه دلوقتي مش احسن؟ "
" اهو .. بحاول ابأه احسن "
" مش ناويه تقلعي الاسود دا بأه "
" بعد الاربعين .. مستحيل اقلعو دلوقتي
"
" طيب ياحبيبتي .. "
وصلو ع الجامعه وركنو عند الكافيتريا وماجي
كلمت بيتر قالها انه قاعد جوا مستنيهم ..
دخلو سلمو عليه وقعدو معاه
بيتر كان باصص لسمر اوي وساكت وسمر كانت
ساكته ومش باصاله
ماجي حاولت تلطف الدنيا شويه ..
ماجي " طب بصو انا هقوم اطلب اي حاجه
نشربها ومينا جاي هقف معاه برا شويه ماشي "
بيتر " خلاص ماشي ياماجي "
قامت ماجي من معاهم وسمر باصه عليها
" ممكن تبصيلي شويه لو سمحتي ؟ "
" نعم يابيتر! "
" مالك فيكي ايه "
" مفيش حاجه "
" من ساعة سامي وانتي فيكي حاجه مش
مظبوطه "
" انا رجعت مسلمه تاني .. وانا وانتا في
ديني منجوزش لبعض .. مش ناويه اكمل معاك يابيتر خلاص "
" نعم !! "
