طلع مجدي برا الاوضه وقفل الباب وراه
نزل قعد ع الكنبه تحت وحط ايده على راسه
مبقاش عارف يفكر ..
ازاي كسر قلب بنته وابنه اوي كدا .. ازاي قدر
!!
معدش عارف يقول لنفسه انتا غلطان ولا ليك حق
في اللي عملته !!
اصل انا بردو ليا حق ادور عاللي محتاجه
وانا معملتش حاجه حرام .. انا متجوزها واهلها
عارفين
بس ولادي ميعرفوش .. هوا دا الغلط اللي انا
عملته
بس مينفعش اقولهم انا هتجوز! مفتكرش انهم
كانو هيتفاهمو
يمكن سامي .. بس سمر لاء!
اعمل ايه بس ياربي .. اعمل ايه !! فقدت
احترام وحب وثقة ولادي الاتنين فيا
وهوا بيكلم نفسه فجأه لقى باب اوضة سمر اتفتح
وطلع منه سامي وقفلو وراه
بص عليه ورجع بص في الارض تاني
حس انه بجد ملوش عين يتكلم معاه .. ولا مع حد
رغم اقتناعه انه معملش حاجه حرام ربنا يعاقبه عليه
نزل سامي وقعد ع الكنبه اللي قصاد باباه
مسح وشه بايده بتنهيده كبييييره اوي بتحمل كل
معاني الوجع
وبص لباباه وهوا مش عارف يقوللو ايه
يواسيه ولا يعاتبه
يقوللو انا فاهمك ولا انا فاهم سمر!
هوا حتى مش عارف ايه موقفه .. غير انه اتوجع
اوي زيو زي اخته
وقرر يتكلم لان معدش في وقت اكتر من كدا للصمت
!!!
فات عمر كامل في السكوت . . .
" بابا "
مجدي رفع راسه بعد ما كان باصص في الارض وبص
لسامي وعنيه بتحمل كل معاني الاسف
من غير ما يتكلم ولا كلمه . .
والتقت عنيهم
يمكن دي اول مره عنيهم تتكلم .. ومش اي كلام!
كلام صريح جدا
" بابا ليه عملتو فينا كدا؟ ليه وصلتونا
اننا منبقاش بني ادمين زي باقي الناس
انا مش عايز فلوس لا انا ولا سمر .. مش
عايزين فيلا ولا عربيات ولا حتى محتاجين موبايلات
مش عايزين كل اسبوع لبس اد كدا .. ولا عايزين
اغلى انواع البرفانات والساعات
مش عايزين كل سنه عيد ميلاد لكل واحد فينا في
فندق بفلوس تكفي مرتب 3 رجاله بيعيشو عليها هما وولادهم
مش عايزين كل دا يا بابا .. احنا احتجنا نحس
اننا ولادكو .. احتاجنا نحس اننا فينا روح !! نحس ان في حد بيخاف علينا
وقت ما نعيا يكونو جنبنا .. مش البواب ولا
الشغاله!
بنرجع من المدرسه زمان .. نتغدى وحدنا وننام
ونصحى نحل واجباتنا ماحد فيكو كان بيسألنا عن اي حاجه في المدرسه
كل اللي عملتوه عشانا حطتونا في اغلى المدارس
وجبتولنا اغلى المدرسين
لكن حتى انكو توصلونا .. ولا حتى تسألونا
عملتو ايه في الامتحان .. مكنتوش بتعملوها
مكناش بنسمعها الا من بعض! ومن سماح!!!
عارف يعني ايه يبأه عندي اب وام وحاسس اني
يتيم ولقيط!؟
عارف يعني ايه معتبر ان مليش اهل!؟
حتى اهلكو .. ناسنا .. منعرفش عنهم حاجه
ليه نافينا في سجن!؟ فاكرين تلفزيوناتنا اللي
في اوضنا ولا اللابات اللي بالالاف لكل واحد فينا هيا اللي معيشانا؟
فاكرين اننا بنحب نعض في الفيلا اصلا؟
الواحد بيجي هنا عالنوم بالعافيه
ولولا سمر بنت كانت هجت م البيت زي مانا بحاول
اهج منه على اد ما اقدر
ليه وصلتونا نحس اننا مش ناس!!
الفلوس مش هيا الحياه! احنا علاقتنا بيكو
فلوس وبس!!
محستوش بينا لما فرحنا ولما اتوجعنا
مشفتوناش لما احتاجنالكو ولما زعلنا منكو
اراهن اننا عايشين في البيت دا اصلا بنجامل بعض
والسلام .. وكل واحد فينا عايش حياه محدش يعرف عنها حاجه
تقدر تقوللي دي غلطة مين؟ انتا ولا ماما؟
انتو عملتو فينا ايه
صنعتو مننا ايه !!
انتا عارف لو سمر بت شمال!؟ والله العظيم ما
هلومها
واهي اختي وعيب اقول كدا عليها .. بس حقها
اصلها معرفتش يعني ايه تربيه بحق ربنا
ولا انا عرفتها .. بس الحمدلله الزمن علمني
اما هيا .. بنت !! مين مفروض يعلمها!
اتقو ربنا فينا انتا وامي .. انتو ضيعتو كل
حاجه حلوه في اي طفل بريء
من يوم ما كنت اد كدا من قبل ما سمر تيجي ..
وانا لوحدي
انا مهما اتكلمت عارف اني بكلم سامحني في
الكلمه علبه جواها حجر
لا انتا ولا ماما عندكو قلوب .. همكو ع
الفلوس والمراكز والحياه الاجتماعيه والناس تتكلم عننا وتشوفنا ازاي وتحسدنا
لكن سامي وسمر دول مش في حساباتكو اصلا
كفايه انا قلت كتير واللي جوايا مهما حاولت
اطلعو مش هيكفي كلام من هنا لسنين قدام
اصلي موجوع بقالي سنين
انا بس عايز اعرف .. هيا الطينه كانت ناقصه
بله ! كمان تعرف ستات! بتخونا يا بابا !!! "
" خلصت كلامك يابني ؟ "
سامي في اللحظه دي حس انه نفسه يولع في مجدي!
ازاي للدرجادي بارد كدا
ولكن قرر طالما بدأ الكلام اخيرا .. ف يكمله
بأه!
" هه!! خلصت؟ لا مخلصتش انا جوايا كتير
بس مش هتكلم اكتر من كدا .. احب اسمعك لاول مره بعد اذن حضرتك يا ابويا! "
" اسمعني يابني .. انتا راجل واكيد
هتفهمني .. غير سمر
والله العظيم اقسملك بالله انا متجوزها ..
انا مبعملش حاجه حرام .. دا شرع ربنا ياولادي ..
امك .. مهياش ام ولا زوجه .. امك مجرده من
المشاعر
انا اتجوزتها عن حب .. بس اظاهر انه وهم!
اتوهمت بيها وافتكرت انها بتحبني زي ما بحبها
لكن للاسف .. كل حاجه بانت بعد الجواز بسنه
.. كل حياتها شغل .. ياما اتخانقت معاها عشان تاخد بالها مني ومنكو
ياما قلتلها مش محتاجين خدامه انتي ست البيت
ومش عايز واحده غريبه تبأه وسطنا
متخلنيش احس اني مقيد ومش عايش براحتي .. لكن
كانت دماغها ناشفه اوي .. جمالها كان الحاجه الوحيده اللي تشفعلها اني اصبر عليها
واستحمل
لحد ماتعبت .. ماهو الجمال فاني زي اي حاجه
ما هتفنى م الدنيا .. وقررت اشوف نفسي بما اني مش لاقيها هنا
واتجوزت .. والله اتجوزت على سنة الله ورسوله
.. واللي متجوزها مبتخلفش .. يعني ملكوش اخوات متعرفوهمش
انا مش عامل حاجه غلط يابني .. انا عامل اللي
ربنا سمحلي بيه .. ولو كانت بتخلف كنت هعرفك انتا واختك على اخواتكو
كنت هحكيلكو .. حتى لو امك متعرفش حاجه مبقتش
اصلا تهمني وجودها زي وجود اي كنبه في البيت
حتى محصلتش الكنبه .. ع الاقل الكنبه تملي في
البيت .. لكن دي همها على شغلها وبس
انا عارف يابني اني قصرت معاك انتا واختك بس
انا كنت بشوف ولاد صحابي اللي اقل مني وكنت بشوف نفسي وانا في سنكو
ومحروم من حاجات كتيره عشان ابويا كان على اد
حالو .. ف حبيت اعوضكو .. بفلوس كتيره
حبيت اتجوز واحده غنيه واعمل من نفسي انسان
غني يفتخر بيه ولادي .. اوديكو احسن النوادي واحسن المدارس والجامعات
واجيبلكو احسن الحاجات .. عشان متحسوش انكو
محتاجين وانكو اقل من غيركو "
" بس احنا فعلا اقل من غيرنا .. الدنيا
مش ماشيه بالفلوس "
" لاء ماشيه بيها يا سامي .. ماشيه بيها
يابني وبكرا تعرف .. بس للاسف انا مخدتش بالي اني مدتكوش اهم حاجه محتاجينها ..
مخدتش بالي اني فعلا مش اب استاهل يتقاللي بابا .. سامحني يابني "
" لو على موضوع جوازك ف انا مسامحك لانك
متجوز على شرع ربنا لكن متطلبش مني اي حاجه تانيه مهياش ب ايدي .. وسمر! مظنش انها
هتعتبرك ابوها بعد كدا .. ياريت تحاول تصلح اي حاجه قبل ما القطر يفوتك لاخر العمر
.. عن اذنك يا .. ابويا "
قام سامي وراح على اوضته من غير اي كلمه
زياده
حس انه خلاص طلع ولو 1% من اللي جواه
واهو احسن من مفيش ..
حس انه ظلم ابوه .. بس ابوه ظلمه وظلم سمر
اكتر .. وبالتالي مكنش حاسس بأي ذنب ناحيته
غير انه مظلوم فعلا من امه اللي مهياش "
الزوجه المثاليه " زي ما الناس فاكرينها
اما مجدي ف قام ركب عربيته .. ومعرفش يروح
على فين !!
. . .
تاني يوم الصبح نزل سامي ع السكشن بتاعه
ود. هناء قامت لبست ونزلت على شغلها
مجدي في بيتو التاني لكن المرادي لوحده ..
كان محتاج يفكر كتير اوي من غير ما ميمي تكون معاه
وسمر .. صحيت م النوم
بصت في الساعه لقتها 10 الصبح ..
بصت في الموبايل لقت مسجات ومكالمات كتيره
جدا
معظمها كانت من بيتر
وقررت انها تديلو كل احساس حلو جواها بما انو
الوحيد اللي يستاهل دا منها
رغم اقتناعها الشديد انه ميجوزلهاش لا دلوقتي
ولا مستقبلا ولا هيحصل ويرتبطو ببعض
لكن في نفس الوقت فكرت ليه لاء .. هوا حد
اصلا هيعرف حاجه عني حتى لو غيرت ديني واتجوزت!
كدا كدا .. محدش يعرف عني حاجه . . .
واتصلت ببيتر
" الو "
" ايه يا سمورتي مبترديش عليا ليه من
امبارح "
" معلش يا بيتر حصلت مشاكل كدا في البيت
ومش عايزه احكي ف حاجه .. "
" ولا يهمك ياحبيبي انتي لسه نايمه
"
" اه اديني صحيت اهو .. انتا فين "
" انا نزلت اجيب هدية عيد ميلاد تالا
اختي واتفق ع التورته وكدا "
" يووووووه نسيت دا انهردا عيد ميلادها
.. "
" اوعي تقولي مش جايه "
" لاء هاجي طبعا وانا اقدر افوت عيد
ميلاد تالا دي حبيبتي "
" وانتي كمان حبيبتي "
" طيب اسيبك دلوقتي في مشاغلك وهكلمك
لما اجي انزل .. هوا انا المفروض اجي امتى "
" ابقي تعالي مع ماجي انا عارفك مبتحبيش
تيجي عندنا لوحدك وبتتكسفي وكدا "
" خلاص اشطه هكلمها اعدي عليها ونيجي
سوا "
" ماشي حبيبتي هستناكي "
قفلو مع بعض وحست فجأه ان الروح دبت فيها
وكأنها كانت ماتت بقالها سنين وانهردا رجعتلها حياتها من تاني
مكالمه واحده بس وكلمة حبيبتي من بيتر ..
بتعدل كل حاجه للاحسن
مهما كان الوضع سيء .. خصوصا بعد ما سمر قررت
انها هتعيش حالة اللامبالاه اللي كل البيت عايشها
مسكت محفظتها وبصت عليها لقت فيها 1000 جنيه
سابتهم في المحفظه وقامت تشوف هتلبس ايه وبعد
ما خلصت لبس طلعت الشنطه اللي تليق على لبسها
فتحتها عشان تحط الفلوس في المحفظه اللي في
الشنطه اللي هتمسكها
لقت فيها 1500 جنيه تانيين
بصت للفلوس باشمئزاز وحسره لكنها كما قررت
انها تعيش لامبالاه حطت الفلوس على بعض ونزلت
لقت سماح في وشها
" صباح الخير يا سماح "
" صباح النور يا سمر فينك من امبارح ولا
كلتي حاجه ياعيني "
" كتر خيرك ياسماح انتي الوحيده اللي بتسألي
على اكلي "
" زي العاده ياحبيبتي "
" ربنا يخليكي ياسماح .. انا عموما
رايحه مشوار وهتأخر انهردا احتمال اجي في النص اغير هدومي وانزل عيد ميلاد صحبتي
.. هفطر برا "
" طيب ياسمر خدي بالك من نفسك "
وجعت سمر الكلمه دي اوي .. بصت لسماح بحب
كبير وابتسمتلها وباستها على خدها لاول مره
سماح استغربت من البوسه دي لكن فهمت ان سمر
محتاجه حاجه مش لاقياها في البيت
رغم انها كانت بتحسدها عالاب والام الاغنيا
دول .. لكن عمرها ما اتمنت تكون مكانها وحيده اوي كدا ومحدش حاسس بيها
سابتها سمر وخرجت ركبت عربيتها وطلعت على
كافيه
حست انها محتاجه تقعد لوحدها شويه من غير حد
زي مابتكون على سريرها بس المرادي وهيا بتشرب
قهوه وبتفطر
ليست هناك تعليقات:
إرسال تعليق