قامت سمر من ع السرير بعد ما سماح مشيت وقفلت
الباب وراها
راحت مسكت الكيس وفتحته لقت علبه طويله
فتحتها لقت جواها سلسله دهب نازل منها قلب
صغير
وافتكرت انها مره قالت لمجدي انها شافت سلسله
فيها قلب صغير وعجبتها جدا
استغربت اوي لما شافت السلسله
ياترى هوا بيعمل كدا ليه! اشمعنا دلوقتي جاب
السلسله
عشان يصلح غلطته
ولا عشان يعتذر
ولا يمكن عشان يضحك عليها ويسايسها بحركه
وتطلع تضحك في وشه
ولا فعلا حس بغلطته وندم !
مكنتش عارفه السبب بالظبط ايه
بس اللي واثقه منه! انها مكنتش عايزه منه اي
حاجه ابدا
قفلت العلبه وحطتها في الكيس من تاني وانتبهت
لكارت صغير موجود في الكيس
مكتوب عليه " سامحيني "
واستغربت اكتر
هوا بجد بيعمل كدا ليه وهوا انا اصلا من امتى
اهمو
ولو كنت اهمو فعلا ليه عمل فيا انا او اخويا
او ماما كدا
مهما كانت ماما غلطانه بس بالنسبالي الغايه
لا تبرر الوسيله!!
حطت الكارت كمان مكانه وسابت الكيس ع
التسريحه
وافتكرت الموقف لما ردت على " ميمي
" واحساسها كان عامل ازاي
صعبت عليها نفسها اوي ورجعت دموعها تنزل غصب
عنها من تاني
مسحت دموعها وقررت تكلمه
مهو معنى انو مجبلهاش السلسله لحد عندها يبأه
هوا خايف لا تكسفو
لانو متعود دايما لما يجيبلها حاجه هوا اللي
بيديهالها مش بيقول لسماح تديهالها
قامت مسحت وشها وفتحت الباب وطلعت ..
بصت ع الصاله تحت لقت مامتها بتتفرج ع
التليفزيون ومخدتش بالها انها طلعت من اوضتها
بصت على اوضة باباها ومامتها لقتها مقفوله
عرفت انه مجدي فيها ..
وقررت تروح
فضلت ماشيه رجل بتجر رجل وكأنها بتتحايل على
نفسها عشان تروح لحد عندو
مش عارفه دا صح ولا غلط
لكن ع الاقل هيا فعلا عايزه تعمل كدا دلوقتي
يمكن لو بعد شويه مكنتش حست انها عايزه تكلمو
لكن في اللحظه دي .. كانت حاسه اوي كدا
وساعات بنقرر حاجات .. لو في وقت تاني مكناش
عملناها!
وصلت قدام الباب وخبطت
مجدي سمع صوت الخبط وكان نايم ع السرير وحاطت
ايديه على راسه
" ادخل "
فتحت سمر الباب بتردد
وفي الاخر دخلت
بص مجدي لقاها سمر اتنفض من مكانه وقام
واستغرب انها داخله تكلمه !
فضل واقف وهيا دخلت وقفلت الباب وبصت في
الارض
للحظه حست لسانها اتشل
معرفتش تقول ايه !!
وهوا كمان معرفش ايه الموقف دا !
ولا عرف هيا جايه ترمي الهديه في وشو زي ما
امها عملت
ولا تكلمه عادي .. ولا تزعق
ولا ايه موقفها هيكون
لكنه راضي بأي موقف .. كفايه انها جت لحد
عنده ودا شيء مكنش ابدا يتوقعه
بل مكنش متوقع انها اصلا ممكن تتعامل معاه
تاني
بصتله وهوا مازال باصصلها من غير كلام
في الاخر قرر يتكلم
" اتفضلي يابنتي .. تعالي اقعدي "
راحت سمر قعدت على السرير وبصت لباباها اللي
قعد جنبها وبدأت دموعها تنزل
" هوا احنا عملنا ايه عشان تعاقبنا كدا؟
"
" هوا انتي تسمحيلي اخدك في حضني؟
"
" حضنك !! كان فين حضنك من وانا اد كدا
!! كنت فين من زمان ! حضنك جاي تديهوني بعد ايه
بعد ما عرفت انك بتخونا كلنا! ليه !!! هوا
انتا ازاي ينفع اقول عليك انك بابا !؟ قوللي انتا لو مكاني كنت عملت ايه "
" حبيبتي اهدي متعيطيش .. انا معرفش
سامي حكالك ولا لاء بس والله العظيم اني متجوزها
انا مبعملش حاجه حرام .. يابنتي انتي متعرفيش
امك دي ايه .. دي مش انسانه .. دي مش مخلياني انا نفسي انسان
احتجت لمراتي كتير اوي وملقتهاش .. وكان من
حقي اني اتجوز تاني دا شرع ربنا
بدل ما كل يوم اروح مع واحده وانتي عارفه اني
اقدر اوي على كدا سواء بالفلوس او بأي حاجه تانيه "
" يعني اللي انا رديت عليها دي مراتك؟
"
" والله مراتي واهلها عارفين .. ووالله
لو عرفتيها هتحبيها "
" مش عايزه .. مش عايزه شكرا .. كفايه
انتا عارفها .. وهيا ازاي ترضى تتجوزك وانتا عندك بيت تاني "
" ياسمر يابنتي كل واحد في الدنيا دي
ناقص وبيدور ع الكمال .. ربنا خلقنا عشان نكمل بعض
وهيا لقت اللي ناقصها معايا وانا لقيت اللي
ناقصني معاها .. احنا الاتنين احتجنا لبعض واتجوزنا على سنة الله ورسوله "
" المفروض اني افرح ان ابويا متجوز
واحده على امي؟ "
" هوا انتي مبسوطه من امك طيب؟ شايفه
هيا عايشه ازاي ومعيشانا في ايه؟ هيا اصلا موجوده او عايشه غير لشغلها وبس؟ هيا دي
الام اللي اي بيت محتاجها او زوجه لاي زوج محتاجها؟ "
" وحضرتك؟ الاب اللي اي بيت محتاجه؟
"
" حاولت بالفلوس اكون كدا .. لكن فهمت
اني غلطت اني مدتكوش الحنيه اللي لازم اي اب يديها لولاده
كنت واخدها من ابويا وكنت محروم من الفلوس ..
قلت اديكو الفلوس عشان متحسوش انكو ناقصكو حاجه .. ونسيت ان الحب والحنيه اهم من
كدا بكتير .. وموعتش الا بعد ما سامي قاللي .. انا معملتش الا عشانكو .. وبس !
"
" ولما اتجوزت تاني كان عشانا؟ "
" لاء .. عشاني .. ومش شايف اني غلطان
يابنتي .. راجعي نفسك وفكري شويه هتلاقي ان معايا حق ..
واني الحمدلله مغلطتش .. لو غلطت ف اني
محكتلكوش .. خفت اقل في نظركو او متفهمونيش لانكو كنتو صغيرين عن كدا
لكن خلاص كبرتو .. وبردو محكتلكوش .. دي هيا
غلطتي الوحيده "
" اللي محتاج يراجع نفسه فعلا هوا حضرتك
.. "
وقامت وقفت من ع السرير بعد ما حست انها قويت
شويه ودموعها خلصت
وراحت ناحية الباب
بصتله لقته باصص ع السرير مش قادر يرفع عينه
حست انه اتوجع وانه فعلا ندمان ..
لكنها حست انها هيا كمان موجوعه جدا
طلعت من الاوضه وقفلت وراها الباب ودخلت
اوضتها
قعدت ع السرير وبصت في مراية الدولاب قدامها
مسكت موبايلها واتصلت ببيتر
" الو "
" حبيبتي ازيك "
" كويسه انتا عامل ايه "
" تمام ياقلبي "
" انا عايزه اشوفك انتا فاضي؟ "
" اه طبعا ولو مشغول افضالك "
" طيب ساعه ونتقابل في سيلانترو "
" ماشي وخدي بالك من نفسك .. بقولك ايه
"
" ها "
" مالك في ايه صوتك مش عاجبني "
" لما اجيلك هحكيلك "
" ماشي انا مستنيكي هقوم البس اهو
"
" اوكي باي باي "
" باي باي "
. . .
لبس هدومه وخد مفاتيح عربيته ونزل بص على
هناء بقرف وطلع ركب عربيته واتحرك
مكنش عارف يروح على فين !
في الاخر اتصل بـ " ميمي " وقالها
تجهز عبال ما يروحلها
سألتو هيروحو فين قالها لما اجيلك هقولك
قفلو سوا ودخلت ميمي لبست وهوا عدى عليها
وطلعو سوا في العربيه
" مالك ياحبيبي "
" متخانق مع هناء وناوي اطلقها "
ميمي نطت من الفرحه ع الكرسي واتعدلت وبصتله
" بجد؟ "
" بجد ياحبيبتي "
" ياااااااااااااااااااااه وهتبأه ملكي
وحدي ياه بجد ياه "
" مانا كدا كدا ملكك لوحدك .. هيا مش
موجوده اصلا في حياتي ولا بشوفها الا بالصدفه "
" بس بردو على ذمتك .. وانا بغير عليك
ياحياتي "
" بس لو دا حصل هتعيشي معانا في الفيلا
وهسيبلك شقتك دي زي ما هيا بإسمك براحتك اعملي اللي يحلالك فيها "
" حبيبي انتا حبيبي حبيبي ..انا اصلا
والله ما يهمني الا اكون معاك وبس .. نفسي كل يوم تبأه موجود في البيت مش يوم عندي
و 10 عندها في الفيلا "
" انا معاكي اهو على طول ياحبيبتي
" ومسك ايدها باسها عليها
" بس ايه اللي حصل بأه "
" ابدا اتخانقت فيها انهردا جامد اوي
وخلاص وصلت لاخري معاها .. المهم .. سمر اتكلمت معايا انهردا "
" خير .. ؟ "
وحكالها على اللي حصل
" تصدق يا مجدي نفسي اعرفها هيا وسامي جدا
.. نفسي اتعامل معاهم .. انا متأكده اني هحبهم لانهم ولادك "
" انتي بجد احلى حاجه تحصل للواحد في
الدنيا .. "
" مقولتليش موديني على فين "
" الاول هروح اجيبلك حاجه على زوقك دهب
عشان جبت لسمر .. وبعدين نروح نتعشى في اي حته تختاريها ايه رأيك "
" انا بحبك اوي على فكره "
" وانا كمان بحبك اوي يا ميمي "
. . .
لبست وجهزت وبصت على الكيس اللي جالها من
باباها
طلعت العلبه وفتحتها
مسكت السلسله في ايدها وابتسمت ابتسامه بسيطه
جدا ولبستها .. ونزلت !
ملقتش حد في البيت
راحت لسماح المطبخ ملقتهاش
خبطت على اوضتها
فتحتلها سماح بعد دقيقه واقفه سمر برا
" ايه دا انا صحيتك ياسماح انا اسفه
"
" معلش واحده بواحده بأه "
" ههههههه ماشي بقولك ايه هوا فين الناس
اللي هنا "
" مجدي بيه خرج من يجي ساعه ونص ساعتين
كدا .. والهانم معرفش فين اخر حاجه حصلت بعد ما مجدي بيه مشي انها طلعت اوضتها
بعدين انا دخلت نمت "
" اممممم .. ماشي انا خارجه عشان لو حد
سأل دا لو حصل يعني .. عايزه حاجه "
" ربنا يكرمك "
" يلا باي باي "
" مع السلامه "
ليست هناك تعليقات:
إرسال تعليق