خلص السكشن بتاعه وطلع هوا وشادي وطلعو من
غير كلام راحو قعدو في الكافيتريا
" مالك يا سامي م الصبح وانتا مش مظبوط
"
" ابدا مفيش "
" مش متعود عليك وانتا بتكدب عليا
"
" معكش اي حاجه اولعها؟ سجاير ولا حاجه
"
" نعم !! "
" انجز "
" لا معيش منتا عارف مبشربش .. "
" طب تعالى نروح الكافيه بتاعنا عايز
اشرب شيشه وكلم العيال نتقابل اهو الواحد يتسلى شويه بدل الملل دا "
" انا مش متحرك من هنا الا اما افهم في
ايه "
" تعالى معايا وهحكيلك في السكه "
. . .
نزل الشغل بدري .. خلص حاله بسرعه بعد ما لغى
حاجات كتير ومواعيد كتير مهمه كانت عنده
وراح راكب عربيته واتصل بـ " ميمي
"
" الو "
" ايه ياحبيبي طمني عليك "
" انتي فين "
" في البيت عند بابا وماما "
" طب انا جاي "
. . .
اشترت بنطلون جينز وبلوزه بيضه وخرجت ركبت
عربيتها ومسكت موبايلها
" الو "
" ايوا يا سمر صباح الخير "
" يابت صباح الخير ايه الساعه داخله على
اتنين "
" هههههههه معلش معلش مش مجمعه ياحبيبتي
"
" ولا يهمك .. هتعملي ايه هنروح امتى
عيد ميلاد تالا "
" انتي ناويه على ايه "
" انا لسه والله مجبتلهاش اصلا الهديه
مش عارفه اجيبلها ايه "
" امممممم .. انا جبتلها فستان قصير
"
" الله على افكارك يا ماجي "
" طبعا طبعا .. بقولك ايه مينا جاي
معانا انهردا "
" تمام مش مشكله .. خلاص انا هروح
دلوقتي اشوف هجيبلها ايه وبعدين هروح البيت اغير هدومي واعدي عليكي "
" ماشي هستناكي "
" مينا هنعدي عليه ولا ايه "
" لاء هيجي عندي تحت البيت ونستناكي
"
" ماشي ياماجي باي باي "
" باي باي "
خلصت المكالمه ولسه هتحط الموبايل في الشنطه
لقت بيتر بيتصل
ابتسمت ابتسامه من كل قلبها اوي وردت عليه
فضلت تتكلم معاه لحد ما راحت محل جابت برفيوم
وطلعت على محل فضه جابت خاتم
ورجعت ع البيت
. . .
" ازيك يا سمر "
سمر استغربت اوي م الصوت وهيا بتقفل الباب
وراها
بصت لقتها مامتها قاعده ع الكنبه
راحت لحد عندها بعد ما رمت الشنطه على الكنبه
التانيه ومفاتيح عربيتها والاكياس اللي اشترتها
" اهلا يا دكتور "
" ايه دكتور دي يابنت .. " قالتها
بهزار وكأن سمر بتدلعها بكلمة دكتور
سمر بصتلها وابتسمت ابتسامه قصيره جدا مفهاش
حياه !!
استغربت اوي د.هناء م الابتسامه وحاولت تفهم
في ايه
من تعابير وش سمر ولكن سمر محاولتش تبين اي
حاجه لانها فاهمه دماغ مامتها
" اممم .. ها عملتي ايه انهردا في
الكليه "
" معنديش انهردا كليه " قالتها
بسخريه وكأنها بتقولها بتكسفي نفسك ليه !!
" احم .. اومال كنتي فين "
" كنت بشتري لبس وبجيب هدية عيد ميلاد
صحبتي "
" كان معاكي فلوس؟ "
" انا مش معايا الا فلوس اصلا "
" يعني ايه "
" لا ابدا متخديش في بالك "
حست انها قرفانه ومش عايزه تقعد اكتر من كدا
.. عشان مهما حصل ف هيا قاعده مع حاجه مش بتحس
قامت من ع الكنبه وراحت المطبخ طلبت من سماح
تحضرلها الغدى عبال ما تغير هدومها وتنزل
طلعت ع اوضتها من غير ما تتكلم اكتر من كدا
وخدت معاها حاجتها غيرت ولبست هدوم البيت واتصلت بسامي
" ايوا يا سامي انتا فين "
" مع صحابي في حاجه؟ "
" لا خلاص مفيش "
" مالك بس قوليلي بابا ضايقك ولا ماما؟
"
" لاء بس اصل ماما انهردا في البيت
وهتتغدى ف مش عايزه اكون معاها لوحدي "
" صعب اجي دلوقتي ياسمر "
" لا عادي عادي يلا سلام "
" سلام "
قفل سامي مع سمر وحس انه متدايق انه سايبها
كدا وحدها مع مامتهم وهوا عارف انها مش مبسوطه بالوضع دا
بس كان ولاول مره يشرب شيشه مع صحابه وكمان
حاسس انه مستمتع ..
يمكن يكون استمتاع مزيف ملوش معنى وهيمشي
وهيلاقي انه اصلا كان بيقضي عاللي هوا فيه
لكنه حاول ميخلصش من الاحساس دا لفتره طويله
شويه .. او يمكن على طول !
صحابه كانو مستغربين من اللي هوا فيه لكنهم
كانو مشجعينو الا شادي
وخصوصا بعد ما عرف اللي حصل !!
قام سامي من معاهم واستأذن عشان يروح ع البيت
بدل ما سمر تقعد لوحدها
على اساس انهم هيتقابلو في يوم تاني
ركب عربيته وطلع ع البيت
لقى مامته قاعده هيا وسمر
دخل قعد معاهم
وسمر لما شافته وكأن قلبها رفرف !
حست انها اخيرا مش لوحدها
ابتسمتله ابتسامتها اللي الكل بيحبها ودخل
وهوا عارف معنى الابتسامه
بصلها وابتسم هوا كمان وقعد
" ازيك يا سامي "
" الحمدلله "
" ايه كنت فين "
سامي استغرب من السؤال وبص لسمر باستغراب
سمر بصتله وكأنها بتقوللو امشي معاها في
الكلام وانجز عشان هيا انهردا فيها حاجه ..
" كنت في الجامعه "
" وعملت ايه "
" معملتش "
سمر هنا ضحكت ضحكه خفيفه بصتلها مامتها بعدها
ورجعت بصت لسامي لقته هوا كمان بيضحك
د.هناء " هوا في ايه "
سامي " مفيش "
د.هناء " بتضحكو على ايه "
سمر بكل سخريه " لا ابدا افتكرنا حاجه
"
د.هناء " انتو الاتنين افتكرتوها مع بعض
؟ "
سمر وسامي بصو لبعض وابتسمو وكملو اكل من غير
ما حد فيهم يرد
اما مامتهم ف كانت مش فاهمه اي حاجه ..
قامت من ع الاكل بعد ما خلصت وطلعت على
اوضتها من غير كلام
سمر وسامي خلصو اكلهم وكانت مامتهم طلعت . .
" شكرا يا سامي "
" على ايه ياعبيطه انتي اختي "
" انا قومتك من الخروجه معلش بس انتا
اديك شايف اهو "
" ولا يهمك "
" انا نازله انهردا عيد ميلاد صحبتي على
فكره "
" ماشي خدي بالك من نفسك "
قالهالها وباسها على راسها وطلع على اوضته
ابتسمت سمر بعد الحركه دي وحست انها مبسوطه
قامت هيا كمان وطلعت على اوضتها ونامت ع
السرير . . .
. . .
مجدي " ازيك يا عمي "
ابو ميمي " الحمدلله انتا عامل ايه
يامجدي "
مجدي " بخير الحمدلله .. اومال فين
مراتي بأه "
ابو ميمي " اهي جايه تلاقيها في المطبخ
مع امها ولا حاجه "
وجت ميمي من جوا وقام باباها عشان يسيبهم
لوحدهم . . .
ليست هناك تعليقات:
إرسال تعليق