" ها يا دينا
هديتي؟ "
دينا فتحت عنيها وبصت حواليها ونزلت دموعها من تاني
" لالالا مش عايزه دموع انا .. انا عايزاكي تبصي
للشباك اللي هناك دا شايفه الشمس منوره ازاي .. عايزاكي تنوري دنيتك زيها كدا
مش عايزه حاجه تحبطك او تيجي عليكي "
دينا بصتلها وابتسمت ابتسامة سخريه ممزوجه بالالم
وغمضت عنيها مره تانيه
افتكرت كل حاجه حصلت في اليوم دا
كل همسه اتقالت
كل لمسه .. كل شهقه .. كل نظره .. كل كلمه .. كل ثانيه
حصل فيها حاجه
افتكرتها
غمضت عنيها جامد اوي وكأنها بتقول بس كفايه كفايه كفايه
لكن من غير صوت
كأنها بتصارع ذكريات وحشه من غير ايدين ولا حتى كلام
صراع .. الاقوى فيه هيا الذكريات المؤلمه
والكسبان فيه .. بردو ذكريات .. بتوجع اوي
فتحت عنيها بسرعه بعد ما حست انها بتجري وحد قاعد بيجري
وراها
فضلت تتنفس بصعوبه
وبتبص حواليها بسرعه
" اهدي يا دينا اهدي متخافيش .. اهدي بأه مش عايزين
ناخد حقن تاني "
دينا اول لما سمعت صوت الدكتوره تاني .. رجعت راسها لورا
عالسرير وبصتلها
" ها يادينا .. ممكن بأه منفتكرش حاجه ؟ "
دينا بصت الناحيه التانيه وحست انها لسه مش عايزه تتكلم
" امممم .. ماشي ياستي براحتك بصي بعيد .. بس انا
كدا زعلانه منك "
دينا ولا فرق معاها وفضلت باصه الناحيه التانيه
والدكتوره حست باحراج بس عادي .. هيا اتعودت عالحالات
اللي زي دي فـ متكلمتش
بكلام يزعل دينا
بل بالعكس .. حاولت تدلع دينا اكتر
" طيب ياستي خلاص شكلك انتي اللي زعلانه مني .. ولا
يهمك حقك عليا اهو وادي بوسه على راسك "
وقامت الدكتوره باست دينا على راسها بحنيه
مكنش قصدها حاجه
لكن في حالة دينا .. دينا حست " بسبب ظروفها "
انها بتشفق عليها
فـ اتدايقت اكتر
مع ان البوسه دي .. حسستها بحنيه هيا فعلا محتاجاها
وارتاحت شويه
وبكدا بأت حاسه باحساسين عكس بعض
مش عارفه تزعل ولا تفرح
وهوا بعد اللي هيا شافته واتعرضتله
هتحس بـ ايه حلو بعد كدا
بصت للدكتوره بعيون حزينه
عنيها بتحكي كل اللي جواها من غير كلام
مجرد انين .. من غير صراخ
" طب تعرفي بأه يا دينا .. حتى وانتي زعلانه كدا ..
شكلك امور اوي ايه رأيك بأه "
دينا ابتسمت ابتسامه مكسوره لكن بردو صوتها مطلعش
" طيب يابنوته تعالي معايا نقوم نتمشى في الجنينه
برا ايه رأيك .. دا حتى الجو جميل اوي "
وبردو دينا مدتهاش اي رد فعل
الدكتوره مدتلها اديها ودينا ممكستش ايديها
رجعت تاني الدكتوره اديها وبصت لدينا باستغراب
" يعني يا دندونه عاجبك جو الاوضه دا .. تعالي
اتمشي معايا دنا حتى بيقولو عليا عسوله "
دينا غصب عنها ضحكت ضحكه طلع فيها صوتها بس بصوت واطي
اوي
" الله .. منتي بتضحكي اهو وزي العسل .. زيي كدا
"
دينا ابتسمتلها وحست من جواها انها مرتحالها
" طيب طالما ابتسمتي الابتسامه الجميله دي .. يلا
بينا نطلع نشم شوية هوا ونتكلم سوا "
ومدتلها ايدها تاني
المرادي دينا مسكت ايدها
وقامت معاها .. لبست " شوزتها " وسندت على
دراع الدكتوره
وطلعو سوا
طلعت
مياده " الدكتوره " ومعاها دينا زي مهيا سانده على كتفها
من جواها
حاسه انها مش عايزه لا تكلم حد ولا تشوف حد .. مجرد انعزال عن اللي حواليها هوا دا
اللي محتاجاه
على اد
مهيا محتاجه العزله على اد ماهيا محتاجه حد يفهمها من غير كلام .. بالظبط زي
دكتوره مياده كدا
فضلت
دينا بتفكر لحد ما قطع تفكيرها صوت مياده ..
"
ها يادندونه مش قلتلك الجو هنا احلى .. دا حتى الهوا جميل اوي والشمس انهردا
حاساها منوره نور بيقول يا دينا خليكي معايا "
مياده
مكنتش متوقعه اصلا ان دينا ترد عليها ودا فعلا اللي حصل
لانها
كانت عارفه ان في حالة دينا .. مفيش كلام .. ويمكن الافعال كمان تكاد تكون معدومه
"
تعالي يا دينا نقعد عالكرسي دا "
راحت
مياده ومعاها دينا وقعدو على كرسي موجود في الجنينه قصاد زرع
"
شايفه يا دينا الناس اللي حوالينا اد ايه .. كل واحد من دول اتعرض لمشكله في حياته
عشان كدا هوا هنا معانا
وكل واحد
اعراض مشكلته غير التاني بحكم اللي اتعرضله
انا
عارفه ومقدره اللي انتي فيه كويس اوي .. وفاهمه اللي انتي حاساه "
وبصت
لدينا
دينا لما
سمعت الجمله دي قالت جواها " محدش عارف انا فيا ايه اد منا عارفه وحاسه
"
وبصت
لمياده بسخريه من تاني
"
طبعا يا دينا محدش فاهم اللي فيكي ادك .. ونظرتك دي بتحكي كتير جواكي .. اكتر ما
بتحكي عن السخريه ..
لكن لو
عرفتي كل واحد ظروفه ايه .. هتحمدي ربنا ان هوا دا بس اللي اتعرضتيله "
دينا بصت
الناحيه التانيه وبردو من غير اي رد فعل غير انها عقدت حواجبها بس مش اكتر
"
مقصدش ازعلك يا دينا .. انا اقصد اقولك احمدي ربنا .. لازم كلنا نحمده سواء فينا
زعل او فينا فرح
عموما
انا عارفه انك لا هتتكلمي ولا هتديني اي رد فعل يفيدني .. ودا طبيعي جدا .. لكن
انك قاعده معايا دلوقتي دا بداية تحسن جميل جدا .. صحيح انتي بقالك هنا اكتر من
شهرين .. لكن اديكي بدأتي تتفاعلي شويه وتخرجي من اللي انتي فيه .. انا بس كل اللي
طالباه منك تشوفي الدنيا بنظره تانيه .. مش اكتر ... واحنا هنا دورنا نساعدك على
الموضوع دا "
فضلت
دينا باصه الناحيه التانيه من غير كلام
جت ممرضه
وقالت لمياده ان معاد الغدا بتاع دينا جه
ولازم
دينا ترجع اوضتها
ومشيت ..
"
يلا بينا يا دينا ؟؟ "
دينا
قامت من غير كلام .. والمرادي مسندتش على ايد مياده
ومشيو
سوا لحد الاوضه من تاني
دخلت
دينا اوضتها ودخلت وراها مياده وممرضه داخله بالاكل
بصت
مياده للممرضه وطلبت منها تأكل دينا " كما العاده "
ورجعت
بصت لدينا
"
اشوفك بليل يا دندونه .. كلي كويس "
طلعت
مياده من الاوضه بابتسامتها المعتاده ..
اما دينا
فـ فضلت متابعه مياده بنظراتها وكأنها من جواها بتقولها متمشيش
فضلت
باصه عليها لحد ما طلعت وقفلت الباب والممرضه بتأكلها وهيا في عالم تاني
بعد ما
مياده مشيت رجعت دينا راسها لورا
وكل اللي
كانت بتعمله انها تفتح شفايفها للاكل وبس
خلصت
الممرضه اكل دينا وقالتلها انها طالعه وطبعا متعوده ان دينا متردش عليها
طلعت
وقفلت الباب وراها لكن المرادي دينا مكانتش باصه عالممرضه زي ما كانت باصه على
مياده
مفيش خمس
دقايق ودخلت ممرضه تانيه سلمت على دينا بالكلام وفتحتلها شريط فيديو لمسرحيه هيا
بتحبها جدا
"
على حد علمهم في المصحه من اهل دينا " كنوع من الترفيه عن دينا وانها متبأش
قاعده لوحدها وترجع تفكر في اللي حصل من تاني
وطلعت
الممرضه وخدت الباب في ايديها
دينا
المرادي محاولتش اصلا ترفع راسها لما دخلت الممرضه لانها عارفه ان دا معاد شرايط
الفيديو اللي بيشغلوهالها
وكأنها
بتقول جوا نفسها
"
فاهمين ان دا هوا اللي هيخرجني من اللي انا فيه .. "
ابتسمت
من تاني ابتسامة سخرية لكن المرادي السخريه كانت على نفسها مش على حد معاها
غمضت
عنيها وهيا سامعه المسرحيه من غير اي اهتمام
ولسه
هتسرح في اللي حصل معاها من تاني
جت لقطة
في المسرحيه كل ما بتسمعها بتضحك اوي عليها
المرادي
فتحت عينها وبصت للتليفزيون وابتسمت ابتسامه .. من زمان مبتسمتهاش
لكن
المرادي كانت ابتسامه فيها شرخ كبير
ماهو
طبيعي جدا .. واحده اتعرضت للي دينا اتعرضتله
ازاي
يعيش طبيعي من تاني
وهوا
الازاز لما بيتشرخ .. معقوله يرجع زي ما كان من غير ما يسيب اثر كبير باين اوي !
ليست هناك تعليقات:
إرسال تعليق