والد شهد اتوتر ومعرفش يرد ولا يعمل ايه
مسك موبايل شهد واضطر يرد ..
" الو "
" ايه دا جدو ! "
" اه يا حبيبي ازيك "
" امممم ... كويس ياجدو انتا مع ماما ولا ايه "
" ها .. ااه مع ماما ياحبيبي .. انتو روحتو ؟ "
" ااه روحنا من عشر دقايق كدا .. هوا في ايه يا جدو "
" في ايه فـ ايه يا عمر . "
" ماما متصلتش بينا انهردا كلو وانتا ياجدو برا من قبل ما نصحى ودلوقتي انتا وماما مع بعض وماما مردتش عليا انتا اللي رديت .. كدا يعني ! "
الجد سكت ومعرفش يرد يقول ايه
" هوا ماما زعلانه مني ف حاجه يا جدو "
" ليه بتقول كدا بس "
" يعني .. زي ما قلتلك كل دا ..... "
" لا ياحبيبي هيا مش زعلانه منك بس انا عايز اقولك حاجه "
" قول ياجدو "
" بص ياحبيبي انتا كبير وعاقل .. من الاخر انا ومامتك في المستشفى لما تيجي هحكيلك كل حاجه .. روح البس انتا وميار وخلي السواق يجيبكو على هنا هوا عارف المستشفى "
" مستشفى !! ليه !! ماما مالها ياجدو .. انا قلبي كان حاسس والله العظيم انهردا كلو وانا مش طبيعي ... انا مكنتش عايز اسيبها لوحدها من الاول "
" استهدى بالله يابني واسمعني انا عايزك تعقل كدا انتا راجل ومينفعش اللي بتعملو دا .. وبقولك ايه .. لو ميار عندها حاجه سودا تلبسها خليها تلبسها "
" حاجه سودا !! هوا في ايه ياجدو ماتفهمني الله يخليك .. امي عايشه؟ امي كويسه "
" والله يابني ماما ما فيها حاجه .. اقولك .. بلاش ميار تيجي بحاجه سودا دا حتى يبأه فال وحش خلي الاسود بليل "
" لا اله الا الله هتفهمني ولا لاء "
" هفهمك لما تيجي يلا البس ومتقولش لميار على حاجه احسن تتخض قولها بس ان انتو جايين تاخدوني "
" طيب ياجدو حاضر "
قفلو مع بعض والجد اتنهد وخد نفس كبير جدا
بص قدامه لقى ماجد جاي ومعاه بوكيه ورد كبير جدا ودبدوب كبير
استغرب اوي من منظره واستناه يجي يقرب منه عشان يسألو ..
وصل ماجد وقعد جنب والد شهد
" ها يا عمي ايه الجديد "
" الحمدلله شهد طلعوها من العنايه وكلها شويه وهندخلها وعمر كلمني وقلتلو يجيب ميار ويجي وعلاء راح يطلع تصاريح الدفن ويدفن اخوه من غير تشريح "
" طب الحمدلله كدا كل حاجه ماشيه تمام اوي .. الف حمدلله على سلامة شهد "
" الله يسلمك يابني بس ايه الغلبه دي كلها ايه اللي انتا جايبه دا كلو بس "
" دي حاجه كدا نفرح بيها قلب شهد واحنا داخلين عليها .. حاجه بسيطه جدا متشغلش بال حضرتك "
" والله ما عارف اقولك ايه تسلم ايدك يابني ربنا يبارك فيك وفي عمرك "
" الله يخليك ياعمي ملوش داعي الكلام دا كلو "
جت ممرضه وسألت عن والد شهد
" ايوا انا والدها "
" تقدرو تتفضلو تدخولولها دلوقتي بس هيا نايمه لسه "
" طيب يابنتي شكرا "
قام والد شهد وماجد ودخلو على شهد الغرفه
اول لما باباها شافها دموعه نزلت من غير صوت
اما ماجد ف ساب اللي كان مسكه ونزل ركع شكر لله وقام فضل باصص عليها
باباها قعد جنبها ومسك ايدها وفضل يبوس فيها
اما ماجد ف كان مكتفي بإنه باصص عليها وهوا واقف من بعيد عشان باباها ميفهمش حاجه
كان نفسه يروح ياخدها في حضنه ويطبطب عليها ويقولها حمدلله على سلامتك يا اغلى حاجه في الدنيا
بابا شهد بص وراه على ماجد ودموعه في عنيه ماجد راح وقف وراه على طول وطبطب على كتفه وابتسمله
وموبايل الجد رن ..
" الو ايوا ياعمر "
" ايوا يا جدو انا في المستشفى انتو فين بأه "
الجد وصفلو مكان الغرفه وقفل معاه
ماجد محبش يكون في توتر في الموقف عشان كان حاسس ان عمر مش طايقه من غير سبب
" طيب يا عمي استأذن انا بأه وحمدلله على سلامة شهد "
" لا تمشي تروح فين دا لسه والولاد اهو جايين خليك قاعد وبعدين لازم شهد تشكرك بنفسها عاللي انتا عملتو معاها "
" على ايه بس انا معملتش الا الواجب مش اكتر "
" طب بس خليك طيب لحد ما شهد تفوق بالسلامه "
" لا ياعمي معلش ابأي اجي اشوفها وقت تاني عشان بس الولاد وكدا فـ انتو عيله وانا مش لطيف وجودي دلوقتي "
" يابني عيب عليك الكلام دا "
" ابدا والله لا عيب ولا حاجه العيب اني افضل موجود عن اذن حضرتك والف حمدلله على سلامة شهد "
" الله يسلمك شكرا يابني هستناك "
" اكيد ان شاء الله "
سلمو على بعض
وماجد بيفتح الباب عشان يطلع لقى عمر وميار في وشه
عمر اول لما شافو كشر واستغرب اما ميار ف اول لما شافتو حست قلبها ارتاح سلمو عليه وميار ابتسمتلو ودخلو وماجد مشي ..
ميار " ماما .. مالها ماما ياجدو مالها ماما "
عمر " في ايه ياجدو ممكن افهم بأه وايه منظر وش ماما دا .. هيا عملت حادثه هوا في ايه وماجد دا ايه اللي جابو هنا "
الجد " انتو تعرفوه "
عمر " هحكيلك بعدين بس فهمنا اللي حصل انا مش فاهم حاجه "
ميار " ولا انا .. هيا ماما كويسه ياجدو "
الجد " الحمدلله كويسه ياولاد اهدو بس واقعدو كدا وانا افهمكم كل حاجه ووطو صوتكو عشان مامتكو تعبانه "
ميار وعمر جابو كراسي وقعدو والجد مبقاش عارف يحكيلهم ايه عن ابوهم اللي هوا السبب في كل دا والسبب في موتو ..
فضل الجد قاعد ساكت بيفكر هيقول ايه
عمر " ها يا جدو مش ناوي تقول "
ميار " هوا في ايه انا عايزه افهم طيب "
عمر " وايه حكاية اللبس الاسود دا ياجدو "
الجد بصلهم ومعرفش يحكيلهم ازاي
الجد " هوا انتو كنتو عارفين ان بابا وماما بينهم مشاكل ياولاد "
عمر " اه ياجدو .. ليه ! "
الجد " طب كان ايه سببها "
عمر بص في الارض وميار بصت لجدها
ميار " اقولك يا جدو الصراحه "
عمر " ميار بس "
الجد " سيبها تتكلم يا عمر .. قولي يا ميار "
ميار " عشان بيشرب حشيش واحنا كنا مصرين انها تطلق منه بس هيا كانت رافضه وساكته بقالها سنين عشان خاطرنا "
الجد " هيا كانت عارفه انه بيحشش "
عمر " انتا كنت تعرف ياجدو "
الجد " للاسف انا لسه عارف انهردا بس "
عمر " طب انا عايز بردو اعرف في ايه "
الجد " بصو بأه يا ولاد من الاخر "
وبدأ الجد يحكيلهم كل حاجه ومخباش اي حاجه عنهم بكل التفاصيل اللي يعرفها
ميار بدأت تعيط ومسكت ايد جدو
ميار " جدو بابا ممتش صح! بابا ممتش ! "
الجد " اهدي يابنتي ووطي صوتك وبطلي عياط امك مش ناقصه "
عمر " راح مطرح ما راح بعد اللي عملو فيكي وفيا وفي ماما بتعيطي عليه ! "
ميار " بس دا بابا "
الجد " خلاص ياولاد اهدو "
ميار فضلت تعيط بصوت واطي ومش قادره تسكت ومش مصدقه ان باباها مات
عمر كان متعصب اوي بس لما شاف منظر ميار وهيا بتعيط مستحملش المنظر وخدها في حضنو
فضل يطبطب عليها ويمسح دموعها ويهدي فيها لحد ما هديت شويه
عمر " جدو "
الجد " نعم ياعمر "
عمر " ايه اللي جاب ماجد دا هنا "
الجد لسه هيرد باب الغرفه خبط ...
ليست هناك تعليقات:
إرسال تعليق