" مش مهم انا مين المهم ان مامتك دلوقتي في المستشفى عملت حادثه وانا معرفتش اتصل بمين غيرك "
" ايه !! مستشفة ايه وانتا مين اصلا .. هوا في ايه "
اللي كان معاه عالتليفون ادالو عنوان المستشفى وقفل معاه من غير ما يقوللو هوا مين
كل دا ميار واقفه باصه لعمر ومخضوضه مش عارفه تقول ايه ومش فاهمه حاجه
بعد ما المكالمه خلصت عمر كان واقف ساكت ومش عارف يتصرف
" في ايه يا عمر "
" مش عارف! "
" مين في المستشفى ومين كلمك "
" ماما في المستشفى ومعرفش مين كلمني "
" ايه !! ماما !! ماما مالها يا عمر ها ماما مالها !؟ "
" مش عارف يابنتي اهدي شويه مش عارف حاجه انا "
" طب قالك مستشفى ايه "
" اه "
" طب يلا بينا واقف مستني ايه انتا "
" مش عارف ! "
" يلاااااااا "
وقامت شدت ايده وخدته وركبو تاكسي راحو عالمستشفى
سألو هناك في الريسبشن تحت وعرفو ان فعلا مامتهم موجوده
وراحو عالغرفه بتاعتها لقو راجل واقف برا
عمر حس ان هوا دا اللي كلمو في التليفون
ماجد " عمر وميار ؟ "
عمر " ايوا مين حضرتك "
ماجد " انا اللي كلمتك في التليفون "
عمر " طيب ماشي مين يعني حضرتك وماما فيها ايه "
ماجد " انا ماجد عبدالله .. مقاول .. وعميل عند مامتك كنت متفق معاها على ديكور للشقه بتاعتي وانهردا كنا نازلين نشوف شويه حاجات للبيت وللاسف وهيا جيالي عملت حادثه وكلموني من موبايلها قالولي ان رقمي اخر رقم هيا مكلماه ولما جيت عرفت انها الحمدلله كويسه والحادثه كانت بسيطه وهيا دلوقتي نايمه "
ميار " انا كلمت حضرتك في التليفون مره مش كدا "
ماجد " بالظبط "
عمر كان باين عليه انه متدايق جدا من ماجد دا من غير سبب وماجد نفسه لاحظ كدا
ميار " طب هوا احنا ممكن ندخل نشوفها "
ماجد " اه طبعا اتفضلو "
دخلو عمر وميار وقفل عمر وراه الباب بسرعه لما حس ان ماجد داخل وراهم
ماجد فهم ف فضل واقف برا واتكسف
اما ميار ف مكنش ف بالها غير مامتها وبس طلعت جريت عليها ومسكت ايدها باستها وفضلت دموعها تنزل
" خلاص ياميار اهدي خليها تنام اهي كويسه الحمدلله "
" حاضر "
قعدو شويه ولقوها بتفتح عنيها
فضلو باصينلها لحد ما فاقت
ميار " ماما حمدلله على سلامتك "
شهد " هوا في ايه "
عمر " عملتي حادثه وجابوكي المستشفى وكلمونا وجينالك "
ميار " انتي كويسه يا ماما؟ حاسه بحاجه؟ "
شهد " ضهري بس واجعني اوي "
عمر " الف سلامه عليكي يا امي "
ميار " سلامتك يارب "
شهد " الله يسلمكو حبايبي .. حد عرف؟ "
عمر " لاء محدش "
شهد " ازاي نزلتو طيب وسعد معرفش "
ميار بصت لعمر وعمر محبش يحكي لمامته حاجه وهيا بالمنظر دا فـ غمز لميار وميار فهمت
عمر " ما احنا عرفنا بعد ما هوا نزل "
شهد " هوا خرج بردو "
ميار " اه يا ماما قال ان وراه مشوار "
شهد " يادي مشاويره اللي مبتخلصش وجدو؟ اوعى تكونو قولتولو حاجه "
ميار " لا يا مامتي مقلنالهوش متخافيش "
عمر " احنا جينا اول ما عرفنا على طول اصلا "
شهد " انتو عرفتو ازاي "
عمر " واحد اسمو ماجد كلمني "
شهد اول لما سمعت اسم ماجد اتخضت
شهد " ايه ماجد !!؟ ازاي .. ايه حصل .. هوا فين "
عمر استغرب من ردة فعل شهد
ميار حكت لمامتها اللي حصل
شهد " وهوا فين دلوقتي "
عمر " واقف برا "
شهد " طب مش عيب كدا ! خلوه يدخل طيب "
عمر " وانتي نايمه كدا يا ماما ! مش كفايه انو كان معاكي طول الوقت لحد ما جينا احنا هنا "
شهد " معلش يا حبيبي قوم خليه يتفضل عيب "
عمر " طيب يا ماما "
وطلع عمر ملقاهوش برا دور عليه في الدور كلو ملقاش حد نزل لحد تحت بردو ملقهوش
وقام طلع تاني لغرفة شهد
دخل الغرفة لقى الممرضه واقفه بتقيس لشهد الضغط
وطلعت وعمر طلع وراها
" لو سمحتي "
" تحت امر حضرتك "
" انا عمر ابن مدام شهد "
" اهلا وسهلا .. اؤمرني "
" معلش بس كنت عايز اعرف هوا الاستاذ اللي جه مع ماما المستشفى فين كان واقف هنا من يمكن نص ساعه كدا "
" ايوا استاذ ماجد "
" تمام هوا دا "
" دا دفع حساب المستشفى ومشي "
" ايه ! "
" في حاجه يافندم؟ "
" ها ! لا ابدا مفيش .. طيب معلش سؤال تاني هيا ماما هتطلع امتى "
" هيا مفهاش حاجه الحمدلله وانا قلتلها ان الدكتور كتبلها على خروج لانها مصره على كدا وهيا الحمدلله مفيش في جسمها غير كدمات بسيطه جدا عند رقبتها وفي دراعاتها "
" طيب الحمدلله الف شكر لحضرتك "
" تحت امرك "
ومشيت الممرضه ووقف عمر مستغرب جدا وبيفكر مين ماجد دا وبصفته ايه يدفع حساب المستشفى
وهوا واقف طلعتله ميار
" في ايه يا عمر طلعت تاني ليه وفين عمو ماجد دا "
" في حاجه غريبه يا ميار "
" اللي هيا ايه "
" الراجل دا وراه حاجه "
" يعني ايه "
" مش عارف .. دفع لماما حساب المستشفى ومشي "
" نعم "
" زي ما بقولك كدا "
" ودا مين عشان يعمل كدا "
" هوا دا اللي عايز اعرفو من ماما .. ! "
" طب تعالى نسألها .. هيا اصلا استغربت انك دخلت وطلعت على طول وهوا مجاش معاك "
" طيب تعالي ندخل "
دخل عمر ووراه ميار
شهد " ايه يا عمر في ايه "
عمر " مفيش يا ماما .. "
شهد " اومال طلعت تاني ليه وماجد مجاش معاك ليه حصل حاجه ولا ايه "
عمر بص لميار عشان يقولها اتكلمي انتي وميار فهمت وحكت لمامتها
عمر " مين دا بأه يا ماما "
شهد " ها !! زي ما هوا قالك ياحبيبي دا بشتغل على ديكور بيته "
ميار " وواحد بتشتغليله على ديكور بيته يدفعلك يا ماما حساب مستشفى زي دي "
شهد " اكيد من باب الذوق يعني وكدا .. وبعدين فين موبايلي اكلمو اشكرو "
عمر " اديني اشكرو انا طيب "
شهد " عيب يا حبيبي الراجل عمل معايا واجب ومينفعش اني اخليك تكلمو بدالي "
عمر حس انه مش مرتاح للموضوع دا ورغم كدا ادى مامته الموبايل
اتصلت شهد بماجد وشكرته عاللي عملو معاها وطمنته انها هتطلع من المستشفى انهردا
وهوا قالها انه هيجي ياخدها ويوصلها البيت هيا وعمر وميار
طبعا هيا رفضت بس هوا اصر انهم ميركبوش تاكسي وقالها انه عربيتها فيها خبطات وراح سابها لشركة التأمين تصلحها
قفلت معاه وبصت لعمر لقته باصصلها
شهد " في ايه "
عمر " ايه اللي حصل "
شهد " ابدا ودالي عربيتي تتصلح في شركة التأمين واصر عليا يجي يوصلنا البيت بنفسه "
عمر " مش هركب معاه "
ميار " ليه يا عمر دا شكلو باين عليه ذوق اوي "
عمر " انا بأه شايف انو بيعمل حركتين بس مش اكتر "
شهد " عيب يا عمر الكلام دا .. الراجل بيعمل الواجب بس مش اكتر "
عمر " واجب ايه اللي بيعملو ما ناخد تاكسي ونروح والله معانا فلوس الحمدلله .. ولو على حساب المستشفى بردو معانا فلوس مش محتاجين على فكره "
شهد " خلاص ياعمر "
عمر " خلاص فعلا وانا مش هركب معاه "
ميار " بطل بأه الله! يعني نكسف الراجل وهوا بيتعامل معانا بالاصل "
شهد " خلاص متركبش يا عمر شكرا يابني انا هركب معاه انا وميار "
عمر " واياك انا هسيبكو تركبو معاه لوحدكو؟ هاهاها ! "
ميار " وبعدين بأه "
شهد " عيب يا عمر اللي انتا بتعملو دا اكبر شويه "
عمر " المشكله ان اللي انا بعملو دا عشان انا كبير بس مش اكتر "
ميار " خلاص اهدى بأه "
شهد " يلا قومو ساعدوني اقوم اقعد احسن يجي وانا نايمه وانتا يا عمر تزعل تاني "
عمر " طب اما يجي طيب "
شهد " ماهو قاللي انو جاي في الطريق وقريب من المستشفى "
قام عمر وميار عدلو مامتهم وقعدوها وقعدو يتكلمو شويه ومفيش عشر دقايق والباب خبط
عمر " اتفضل "
دخل ماجد ومعاه بوكيه ورد كبير اوي
ماجد " سلام عليكم "
شهد " اهلا استاذ ماجد اتفضل وعليكم السلام "
عمر في سرو " استغفر الله العظيم وورد كمان ! اللهم طولك يا روح "
قعد ماجد بعد ما سلم عليهم
ماجد " الف سلامه لمهندستنا والله قلقتينا عليكي "
شهد " الله يسلم حضرتك مكنش له لزوم التعب دا كلو والله "
ماجد " على ايه بس دا حضرتك جمايلك علينا كتيره والله "
شهد " الله يخليك متشكره جدا "
ماجد " وايه يا عمر عامل ايه انتا وميار "
عمر مرضيش يرد واكتفى بابتسامه صفره ماجد حس منها انه غير مرغوب فيه بالمره من عمر
ميار " الحمدلله كويسين يا عمو "
ماجد " طيب .. يلا بينا ؟ .. "
ميار " تقدري تقومي يا ماما ؟ "
شهد " اه هقدر ان شاء الله "
عمر وميار راحو سندوها وكانت بتمشي كويس بس خافو انها تدوخ
ونزلو الاربعه ركبو العربيه عمر جنب ماجد وميار وشهد ورا
طول الطريق ميار وشهد وماجد بيتكلمو وعمر قاعد ساكت
وصلهم البيت وشكرو ماجد وطلعو
وبعد ما دخلو الشقه ..
ميار " بس باين عليه لذيذ جدا يا ماما "
سعد " هوا مين دا اللي لذيذ يا بنت ماما "
عمر " ايه دا .. انتا ايه اللي مقعدك هنا "
سعد " نعم ياحبيبي !!؟ مسمعتش !! دا بيتي وانتو اللي نزلتو منه "
شهد " هوا في ايه ! "
سعد " لااااااااا .. السؤال دا انتي اللي تجاوبي عليه مش حد تاني .. مين اللي كان معاكي طول الوقت في المستشفى يا هانم وجايبك لحد هنا وجايبلك كمان ورد ما شاء الله "
ليست هناك تعليقات:
إرسال تعليق