شهد لما سمعت الجمله دي ..
اتعدلت في قعدتها وبصت لميار باستغراب
" بتقولي عن مين "
" عنك انتي وبابا "
" خير يا حبيبتي خير متخافيش ومتفكريش فـ حاجه خلاص اهدي "
وخدتها تاني في حضنها وكشرت وعقدت حواجبها وهيا مستغربه اوي من ميار
فضلت تهدي فيها وتطبطب عليها
لحد ما سكتت
" ميار حبيبت ماما "
" اممم "
" هقوم اصحي عمر واسخن الغدا انتو مكلتوش ولازم تاكلي وتاخدي الادويه والفيتامينات "
" مش جعانه يا ماما "
" اااااااه هنبدأ بأه .. مفيش دلع ياحبيبت ماما انسي .. يلا خليكي مريحه انتي عالسرير هنا وانا هروح اسخن الاكل واصحي عمر عشان ناكل سوا "
" ماشي يا ماما "
وطلعت شهد عالمطبخ خلصت الاكل وحطته عالسفره ودخلت تصحي عمر
قام عمر دخل يغسل وشو وراحت شهد تقول لميار يلا عالاكل
فتحت الباب ولسه بتقول " ميـــــار ... "
لقتها ماسكه موبايلها وبتتكلم فيه
بصت لميار بصدمه ومعرفتش تتكلم
" ااه اهي مع حضرتك .. ثانيه واحده "
وقامت ميار ادت الموبايل لشهد
" ماما واحد اسمو استاذ ماجد بيقول انه عميل عندك وعايز شغل ديكور عندو للبيت "
" ااااا .. "
" ماما مالك "
" ها ؟؟ لا ابدا مليش ياحبيبتي "
" طب الموبايل "
" ها ! اه ماشي ... روحي يلا عشان تاكلي وانا ثواني وجايه وراكي هخلص المكالمه بس "
" حاضر يا ماما "
وطلعت ميار من الاوضه وقفلت على شهد الباب وشهد راحت قعدت عالسرير لانها مكنتش قادره تسند طولها
وحطت الموبايل على ودنها
" اااا .. الو !! "
" ايه ياحبيبتي "
" حبيبت ايه وزفت ايه يا ماجد "
" نعم "
" اييييييييه اللي انتا عملتو فيا دلوقتي دا حرام عليك يا اخي "
" في ايه يا شهد "
" في ان بنتي ردت عليك عارف يعني ايه "
" وايه المشكله يعني "
" انتا مجنون يا ماجد؟ "
" ياحبيبت قلبي منا قلتلها ان انا عميل عندك .. هوا انتي مش مهندسة ديكور ! انا قلتلها اني محتاج المهندسه بتاعتي عشان البيت عندي ايه المشكله يعني وهيا اساسا مسألتش "
" منتا رقمك متسجل عندي "
" بـ ايه "
" بـ اسمك طبعا "
" طب خلاص ايه المشكله اكيد الناس اللي ليهم شغل معاكي بتسجلي ارقامهم باساميهم ..
حبيبتي انتي بس عشان بيني وبينك حاجه متوتره لكن لو كان اي حد اتصل وحصل الموقف دا كان هيبأه عادي زي ما هوا عادي دلوقتي ميار مشكتش فـ حاجه بلاش انتي تبينلها انك متوتره بأه "
" ماجد مش هينفع كدا احنا لازم نبعد عن بعض انا بأيت حاسه اني عايشه في رعب مش قادره استحمل "
" نعم يا شهد !!!؟ انا مقدرش استغنى عنك "
" وانا مش قادره افضل عايشه كدا يا ماجد "
" ايه اللي انتي بتقوليه دا يا شهد "
" الولاد بيندهو عليا يا ماجد انا هقفل دلوقتي عشان اروح اكل معاهم "
" اصبري يا شهد بنتكلم مع بعض "
" لو سمحت يا ماجد ... ومتنساش .. متتصلش انهردا تاني عشان سعد "
" طب يا شهد زي ما تحبي ... سلام "
" سلام "
وقفلو مع بعض وطلعت تقعد مع عمر وميار
وهما قاعدين بياكلو الجرس بتاع الباب رن
شهد " انتو مستنين حد ياولاد "
ميار " لا يا ماما "
عمر " ولا انا .. ثواني اشوف مين "
وقام عمر يشوف مين بيرن الجرس ورجع
شهد " مين ياعمر "
عمر " صاحبت ميار "
شهد " مين هيا "
ميار " لاء متقولللللللش "
عمر " سمر "
ميار " يااااااااااااااااااااااااااه نسييييييييييييييييييييييييييييييت من التعب يارببببببببببي "
شهد " في ايه يابنتي "
ميار " عندي درس انهردا الساعه 10 "
عمر " نعم يختي .. درس الساعه 10 ازاي يعني والراجل يبأه قاعد معاكو لوحدكو في الوقت دا "
ميار " والله دا انهردا بس وهنا عندي في البيت عشان المستر كان عندو ظروف ومقدرش يديهولنا في معادو الاساسي "
شهد " قومي طب ياحبيبت ماما شوفي سمر بدل ماهيا واقفه كدا عالباب "
ميار " حاضر يا ماما "
وقامت ميار استقبلت سمر
شهد " خف عليها شويه ياحبيبي "
عمر " ماهي جننتني يعني ايه درس الساعه 10 مع راجل وهيا لوحدها مع صاحبتها يعني "
شهد " معلش مره ومش هتتكرر وانا كدا كدا موجوده في البيت "
عمر " انا مش متحرك من البيت الا لما هيا تخلص درسها مع ان والله اصحابي مستنيني كمان نصايه "
شهد " انزل طيب انتا وانا موجوده اهو "
عمر " والله؟ بس يا ماما بس "
شهد " هههههه ماشي ياحبيب ماما "
عمر " هقوم اعمل كباية شاي تشربي؟ "
شهد " ياريت "
وقام عمر يعمل الشاي في المطبخ وقامت شهد تدخل الحاجه اللي كانت عالسفره
ودخلت اوضتها
اما ميار فـ دخلت هيا وسمر عالاوضه اللي هياخدو فيها الدرس
" ايه يابنتي نسيتي ازاي معادنا "
" منا انهردا كنت عيانه شويه يا سمر والله .. انا هقوم اغير هدومي قبل اما يجي هيا الساعه كام "
" 9 ونص "
" ياربي يادوب الحق ثواني ماشي "
" ماشي خدي وقتك "
وراحت ميار اوضتها تغير هدومها
عمر خلص الشاي وراح خبط على مامته
" ادخل يا عمر "
ودخل عمر ومعاه الشاي
" اتفضلي يا ماما "
" تسلم ايدك يا حبيب ماما .. انزل يا حبيبي غير جو انهردا الخميس "
" لا يا ماما معلش لما المستر يمشي هبأه انزل "
" ياحبيبي انتا تالته ثانوي وانهردا اليوم الوحيد اللي بتخرج فيه شويه متخفش انا موجوده "
" خلاص بأه يا ماما مش هسيبكو الا لو بابا جه "
" هه! ابوك !! طيب يا حبيبي .. انا هقوم اسلم على سمر "
" طيب يا ماما وانا قاعد في اوضتي لحد ما المستر يجي "
" ماشي حبيبي "
طلع عمر على اوضته وطلعت شهد سلمت على سمر صاحبت ميار ورجعت تاني على اوضتها
حطت دماغها عالسرير ومسكت كباية الشاي
وفضلت تفكر في علاقتها اللي كلها غلط في غلط مع ماجد ...
في اوضة عمر ..
كان قاعد في البلكونه وبيتكلم في الموبايل
باب اوضته خبط بس هوا مخدش بالو ..
" عمر "
" ثانيه واحده يا ياسمين .. "
وبص عمر على ميار
" نعم يا ميار "
" انا فضلت اخبط على باب اوضتك انتا مردتش عليا "
" مسمعتش الباب والله .. مالك في ايه "
" هوا انتا زعلان مني؟ "
" وانا بزعل من حبيبت قلبي بردو "
" عشان الدرس وكدا "
" لا ياحبيبتي انا موجود لحد ماتخلصي الحصه "
" ايه دا مش هتنزل "
" لما تخلصي مش مشكله "
" ياربي لغبطتلك اليوم انا كدا "
" مش هرد عليكي ياحلوه "
" ههههههه ماشي .. طب بقولك ايه "
" قولي "
" ايه رأيك في اللي انا لابساه .. يعني عشان المستر وكدا "
" تمام اوي وعاجبني اوي .. عايزك دايما كدا "
" حاضر "
" بوسة عمر فين "
وراحت باسته على خده وهيا طالعه
" ميار "
" نعم "
" لما الجرس يرن متفتحيش الباب انا اللي هقوم افتح للمستر عشان يعرف اني هنا "
" هههههه مجنون بس حاضر "
" ماشي ياعسوله "
طلعت ميار وقفلت الباب وراها خدت كتبها من اوضتها وطلعت لسمر قعدت معاها
عمر رجع كمل مكالمته
" ايوا يا ياسمين معلش اتأخرت عليكي "
" عارف انا لو اخويا زيك كدا هبأه اسعد انسانه في الدنيا "
" ههههه اشمعنا "
" يعني .. بتحبها اوي "
" اكيد مش اختي الوحيده "
" يابختها انا هبدأ اغير شكلي "
" تغيري !؟ تغيري من مين وليه "
" من اختك عليك "
" ايه الكلام الفاضي دا .. انتي صحبتي في المدرسه وزي اختي رغم ان محدش عندي زي اختي بس يعني .. اكتر من كدا مفيش "
" شكرا ياعمر "
" لاء العفو يا ياسمين انا مبحبش الاسلوب دا .. متحسسنيش اني وعدتك هجيلك بكرا اخطبك من اهلك .. احنا صحاب يابنتي انا واحد عندو 17 سنه يعني لو عملنا ايه ولو احنا اصلا بنحب بعض مستحيل نرتبط دلوقتي .. انا انسان واقعي مش اكتر "
" خلاص خلاص ياعمر "
" هيا الصراحه بتزعل اليومين دول ولا ايه "
" انا مش زعلانه "
والجرس رن ...
" طب انا هقفل دلوقتي سلام "
وقفل قبل ما يسمعها بتقول سلام
راح فتح الباب للمستر وسلم عليه
ودخل قعد في الساله عشان الاوضه اللي بياخدو فيها الدرس مفتوحه عالصاله
فضل عمر قاعد بيتفرج عالتليفزيون وميار وسمر في الاوضه مع المستر بياخدو الدرس
وعالساعه 12 ونص كان المستر مشي وسمر فضلت قاعده مستنيه باباها يجي ياخدها
" ميار انا نازل بأه عايزه حاجه "
" لا يا عمر خد بالك من نفسك عشان خاطري "
" حاضر متخافيش .. قولي لماما اني نزلت لو سألتك عليا عشان اخاف تكون نامت واصحيها "
" ماشي "
" يلا سلام "
" سلام "
نزل عمر وقعدت سمر وميار يتكلمو
وشويه باب البيت اتفتح . . .
ووقفت ميار مخضوضه !
ليست هناك تعليقات:
إرسال تعليق