نرمين: انا محتاجه اتكلم معاكي بجد
سـلمى اتنرفزت وكان نفسها تقولها انتي بتستهبلي بس حاولت تهدى وتسيطر على اعصابها
سـلمى: براحه طيب .. في حاجه بينك وبين وليد
نرمين: مش بحبه
سـلمى: انتي بتهزري؟ وجايه تفتكري دا انهردا وانتي خطوبتك بعد بكرا
نرمين: كنت بحاول اكدب على نفسي ياسـلمى .. انا بجد غلطت لما بعدت عن احمد وربنا عاقبني
سـلمى: والحل؟
نرمين: انا قلت لوليد مش عايزاك
سـلمى: انتي اتجننتي يابت انتي؟
احمد في نفس الوقت كان بيخبط على الاوضه عند سـلمى
سـلمى: ثواني يانرمين ..
ادخل
احمد دخل وبصلها وهوا ساكت
سـلمى حطت ايدها على الموبايل عشان نرمين متسمعش
سـلمى: ايه يا احمد في حاجه؟
احمد: سمعت صوتك وانتي بتزعأي في حاجه؟
سـلمى: لاء
احمد: مين على التليفون
سـلمى: امممممم !!
احمد: في ايه ياسـلمى
سـلمى: نرمين
احمد سكت
وسـلمى كمان ساكته
احمد حاول يبأه عادي ويكسر السكوت دا
احمد: كلميها طيب
سـلمى: طب وانتا
احمد: انا قاعد مش هطلع
سـلمى: بلاش
احمد: يلا ياسـلمى
سـلمى رجعت ردت على نرمين
سـلمى: معلش يانرمين اتأخرت عليكي
نرمين: ولا يهمك قوليلي .. اعمل ايه
سـلمى: مش عارفه! بس بجد كدا غلط
نرمين: احمد في حد في حياته؟
سـلمى بصت لاحمد بعدين قالت: لاء
نرمين: انا هتصل بيه
سـلمى: اوعي
نرمين: ليه
سـلمى: يعني مش عارفه
احمد شاور لسـلمى وسـلمى اعتذرت لنرمين وقالتلها انها لازم تقفل
سـلمى قفلت مع نرمين وبصت لاحمد
احمد: في ايه بأه
سـلمى: مش مهم يا احمد ونبي
احمد: سـلمى انا جوايا احساس مش حلو ابدا فـ قوليلي وانجزي
سـلمى: نرمين سابت وليد وبتقول انك وحشتها ومفيش خطوبه خلاص! وكانت عايزه تتصل بيك لما عرفت ان مفيش حد في حياتك بس انا قلتلها اوعي
احمد فضل ساكت!
سـلمى: ايه رأيك
احمد: رأيي؟ انا مش عارف اقول ايه
هيا عايزه ايه .. ليه بتعمل كدا هوا انا لعبه في ايديها
سـلمى: نسيتها؟
احمد: تفتكري اقدر؟ انا اصلا لما بتعب كل مره بس عشان بفكر فيها وبفتكرها
سـلمى: عندك استعداد ترجعلها
احمد: نفسي بجد .. بس ازاي بعد كل اللي حصل
سـلمى: انا هقولها تكلمك يا احمد وشوف ايه رأيك
احمد: لاء ياسلـمى انتي خليها تنزل انهردا في نفس المكان اللي دايما كنا بنتقابل فيه وانا هاخدك ونروح نقعد معاها
سـلمى: حاضر .. طب وسـهام؟
احمد: هيا فين؟
سـلمى: عندها سكشن ولسه في الجامعه مخلصتش
احمد: لاء كفايه انتي .. وخلي الموضوع دا بينا لحد اما نشوف هنعمل ايه
سـلمى: ماشي
سـلمى اتصلت بنرمين واتفقت معاها يتقابلوا انهردا بليل ونرمين كانت الفرحه مش سايعاها بعد اللي سمعته من سـلمى
ظبطت نفسها ولبست كأنها اول مره تروح تشوف احمد
كانت حلوه اوي .. بصت لنفسها في المرايه وقالت: يارب نرجع يا احمد .. وحشتني اوي
راحوا في ميعادهم وكانت نرمين مستنياهم
اول ما احمد شاف نرمين مقدرش يشيل عينه من عليها وكأنها فعلا اول مره يشوفها فيها .. حس انها فعلا وحشته اوي
نرمين جت عينها في عيون احمد وكانت مش مصدقه نفسها معقوله احمد واقف قدامها من تاني .. معقوله حب حياتها هيرجعلها تاني
ياااااااااه يا احمد اد ايه وحشتني
سـلمى وهيا بتسلم على نرمين: ازيك يا نرمين عامله ايه
نرمين: الحمدلله يا سـولي انتي ازيك وازي كريم
سـلمى: الحمدلله كلو تمام
احمد مد ايده لنرمين ولسـه عيونهم متقابلين
حس ان لسانه اتشل ومعرفش يتكلم بس عينه كانت بتقول وحشـتيــــــــــني يانرمين
نرمين كمان مقدرتش تقول حاجه واكتفوا بسلام الايدين وشوق العيون وقعدوا ...
سـلمى حبت تحرك القعده شويه خصوصا ان كلها صمت كدا
سـلمى: ها يانرمين في ايه
نرمين بصت لاحمد لقيته سرحان فيها اوي
نرمين: احمد
احمد: نعم
نرمين: انا مش هتخطب لوليد
احمد قلبه كان بيدق جامد اوي ومقدرش يرد عليها
نرمين: انا عارفه ان زمانك كرهتني دلوقتي ونسيتني بس انا لسه بحبك ولسه عايزاك وغلطت اوي يوم ما بعدت عنك ومعرفتش ازاي وافقت على وليد يكون شريك حياتي معرفش اصلا ازاي قبلت على نفسي ابأه مرات حد في الدنيا غير احمد حبيبي بس انا كنت عميا مكنتش شايفه حاجه ولا فاهمه يوم ما بعدت عنك عشان السفر اللي انتا سافرته واديني رجعتلك بعد فرقه سنتين وبقولك سامحني وانا راضيه بحكمك فيا
احمد: انا السنتين اللي سافرتهم كنت مسافر أأسس نفسي عشانك عشان اقدر اجي اتقدملك وانا معايا شغلانه تكون في عيون اهلك نور ويقبلوني .. وبعدتي عني مع اني كنت بعمل كدا عشانك
نرمين: متخليش قلبك اسود بأه .. انا اسفه سامحني
احمد: مقدرش غير اني اسامحك لاني بحبك
سـلمى: لسه بتحبني زي ما كنت يا احمد؟
احمد: حالا هثبتلك
احمد بص لسـلمى: بقولك ايه ياسـولي
سـلمى: اؤمرني
احمد: كلمي ماما حالا وقوليلها تجهز هيا وسـهام وهنعدي عليهم
سـلمى: هنروح فين
احمد: اسمعي اللي بقولك عليه بس
سـلمى: حاضر
واتصلت سـلمى بمامتها وقالتلها تلبس هيا وسـهام
احمد: نرمين
نرمين: نعم يا احمد
احمد: هوصلك البيت واروح اجيب ماما وسـهام ونيجي نقرا فاتحتنا
نرمين: انتا بتقول ايه
سـلمى: هههههه ايه يا احمد بتقول ايه فعلا
احمد لنرمين وكأنه مسمعهمش: وخطوبتك في ميعادها بعد بكرا بس ليا انا مش لوليد
نرمين: يامجنون
احمد: مجنون بيكي الله يسامحك
نرمين وسـلمى: هههههههههه
احمد راح يوصل نرمين ونرمين قالت لاهلها يجهزوا عشان جايلهم ضيوف
احمد راح وجاب مامته وسـهام وراحوا على بيت نرمين
الام: على فين يابني
سـهام: اه اه على فين يامجنون في الوقت دا
سـلمى: هههههههه خد عندك يا احمد .. رد عليهم
احمد: رايح اخطب!!!!!!!
ليست هناك تعليقات:
إرسال تعليق