سامر سكت ومعرفش ينطق ولا كلمه .. ايوا كان حاسس انها بتحبه من معاملتها ليه وقت الشغل وبياخد باله من نظراتها ليه
بس مهما كان .. لما اتحط في الموقف فعلا كانت صدمه كبيره ليه
فضل باصص في الارض ووشه اتقلب الوان ..!
" مالك يا سامر "
" ها .. ابدا مليش "
" هوا انا قلت حاجه غلط؟ "
" لالا ابدا مفيش حاجه "
" انا عارفه اني اللي قلته دا محرج جدا بالنسبالك وبالنسبالي والله .. بس انا مش قادره اكتم مشاعري اكتر من كدا ..وانتا مش قادر حتى تديني اهتمام اكتر من زميله معاك في الشغل "
" سامحيني يامريم غصب عني "
" انتا مرتبط او في واحده في حياتك ياسامر؟ "
سامر بردو تاني معرفش يرد عليها يقولها ايه .. مهما كان هوا اه مش مرتبط لحد دلوقتي بس بردو هوا مش حاسسها ومش متخيل نفسه معاها ومستحيل يظلمها معاه .. لو جرحها دلوقتي احسن مايظلمها ويجرحها بعدين ويكدب عليها
" سامر "
" نعم "
" انا اسفه مع السلامه "
" استني بس "
وجايه تمشي مسكها من دراعها
" استنى ايه وانتا بتحطني في موقف اني جايه اطلب منك تحبني !! "
" مش قصدي والله انا اسف سامحيني بس انا فعلا شبه مرتبط وخطوبتي قريب انشالله ومقدرش اظلمك معايا او اكدب عليكي "
مريم عيونها دمعت ومشيت بسرعه من غير ولا كلمه زياده وسامر محاولش يخليها تستنى اكتر من كدا عشان فعلا الموقف بأه محرج اوي وفي نفس الوقت لازم تنصدم عشان ميظلمهاش
ركب عربيته وروح عالبيت
في نفس الوقت كانت ايه بتتصل بـ الاء
" الو ايوي ازيك "
" تمام ياحببتي انتي عامله ايه "
" انا تمام اهو "
" اتغديتي ولا لسه "
" لاءا لسه قاعده بدح بعيد عنك "
" طب انا عازماكي عالغدا عندي يلا البسي وتعالي "
" لالالا ملوش لزمه التعب دا "
" تعب ايه هوا احنا في بينا الكلام دا ياعبيطه يلا انجزي ماما مستنياكي وكمان هنعد نذاكرلنا شويه مع بعض "
" خلاص حاضر استأذن من بابي بس الاول "
" ماشي مستنياكي باي باي "
" سلام "
الاء اتصلت بباباها تسأذن منه وقالها انه موافق غيرت هدومها ولبست احلى حاجه عندها وعملت شعرها وخدت كتبها ونزلت
خدت الطريق مشي وطلعت بيت ايه وخبطت الجرس .. مره اتنين تلاته محدش رد
لسه هتمشي الباب اتفتح وشمت ريحة برفان جميله اوي وهاديه اوي اوي .. غمضت عنيها وابتسمت
" الاء "
فتحت عينها لقيت سامر قدامها ومبتسم ليها ..
اول لما جت عينها في عنيه قلبها دق جامد اوي وابتسامتها فضلت مرسومه على وشها
حست انها اول مره تشوف سامر .. وهوا حس انه بجد بيحبها اوي
هيا قرت في عنيه كلمة بحبك وهوا شاف في ابتسامتها راحه اول لما شافته
" ازيك يا الاء "
" الحمدلله "
" اتفضلي "
الاء بصت في الارض ودخلت البيت وقعدت
سامر دخل اوضته بص في المرايه لقى نفسه لسه مبتسم ومش عارف ايه حكاية الابتسامه دي
طلع نده على ايه لقاها مع مامتها في المطبخ
طلع لـ الاء ..
قعد وبصلها بصت في الارض واتكسفت .. قلبها كل دا كان بيدق جامد اوي وجواها قاعده تقول الله يحرقك يا ايه والله لما اشوفك تحطيني في الموقف دا
وكأن سامر سامع قلبها ..
" ايه في المطبخ مع ماما وشويه وطالعالك وانا قاعد معاكي عشان متقعديش لوحدك لو مدايقك وجودي انا همشي "
" لالالالا مفيش اي حاجه انتا مونسني "
" بجد والله "
" ااه "
" الاء ممكن اطلب منك طلب "
" اكيد طبعا اتفضل "
" ممكن نكون اصحاب .. احكيلك وتحكيلي ونبأه قريبين من بعض ونعرف بعض اكتر؟ مجرد اصحاب مش اكتر والله "
الاء بصتلو بلؤم بطرف عنيها وبكل دلع:
" لاءااا "
" ااه طيب انا اسف بجد اني اتدخلت في حاجه مليش فيها وطلبت حاجه مش من حقي انا هقوم اندهلك ايه تاني عن اذنك "
لسه هيقوم بسرعه الاء مسكت ايده
حس في كهربا في جسمه من لمسة ايدها وبسرعه هيا شالت ايدها
بصلها ..
" متمشيش "
" ليه "
" حاسه انك وانتا موجود انا متطمنه "
" يعني قبلتي "
بصوت واطي كأنها بتهمس لنفسها " ااه طبعا "
سامر ابتسم وحس انه ارتاح وانبسط اوي ورجع قعد على الكرسي تاني
الاء حست انها كانت مغيبه عن الوعي الكام لحظه اللي فاتو دول ومش عارفه ازاي عملت ولا قالت كدا لكن مش حاسه انها ندمانه ولو رجع بيها الوقت تاني هتعمل نفس اللي عملته
فضلو يضحكو ويهزرو سوا وخدو ارقام بعض وطلعت ايه ومامتها وجه باباها من الشغل وقعدو كلهم يتغدو سوا
خلص الغدا ودخلت ايه والاء يذاكروا
قعدوا يذاكرو كذا ساعه ورا بعض لحد ما الاء حست انها مرهقه جدا وقالت لـ ايه انها هتريح ساعه عالسرير وانها تصحيها بعد ساعه بالظبط عشان يكملو مذاكره
ايه فضلت تذاكر شويه ومامتها ندهت عليها
طلعت ايه من الاوضه وقفلت الباب على الاء ومكنش في حد في البيت غير مامتها
مامتها طلبت منها تنزل تجيب شوية حاجات من تحت وتيجي .. اخدت الفلوس ونزلت وفي الوقت دا كان سامر ساب اصحابه وروح عالبيت
فتح باب الشقه ودخل ملقاش حد .. دخل اوضته غير هدومه وطلع خبط على اوضة ايه ودخل على طول وهوا متوقع ان الاء تكون روحت وايه قاعده بتذاكر ومن عادة ايه لما بتذاكر وحد بيخبط عليها مش بترد وبيدخل على طول عشان كدا هوا دخل
اول لما دخل شاف الاء نايمه عالسرير في الاول نزل عينه في الارض .. قلبه بدأ يدق جامد اوي ولقى رجلو بتسحبو لحد السرير
قعد على طرفه وفضل باصص على وشها .. حس انها ملاك من السما نايم
قرب ايده براحه من غير ماتحس ومشاها على شعرها وهوا عنيه مش راضيه تنزل من عليها
شال ايده وفضل باصصلها ومبتسم ومن جواه بيقول يارب يا الاء تكوني من قسمتي ونصيبي
شويه و ايه دخلت البيت ولاحظت ان باب اوضتها مفتوح دخلت بالراحه لقت سامر قاعد و الاء نايمه
حطت ايدها على شفايفها قبل ماتصرخ والاء تصحى وتبأه مشكله .. دخلت وحطت ايدها على كتف سامر
سامر فاق من السرحان اللي كان فيه وبصلها بعدين سحبها من اديها وطلعوا برا الاوضه وقفلو عليها الباب
" سامر انتا اتجننت ؟؟ انتا عارف لو كانت صحيت كان ايه هيبأه موقفي .. بلاش موقفي انا وموقفك انتا كان هيبأه ايه وشكلك !!؟ "
" غصب عني والله يا ايه مقدرتش اسيطر على نفسي حسيت اني بتسحب ناحيتها لا ارادي "
" الحمدلله انها مصحيتش انا هروح اصحيها بأه عشان قالتلي اصحيها بعد ساعه "
لسه ايه هتدخل تصحي الاء لقيوها طالعه من الاوضه وماسكه الموبايل وايدها التانيه على عنيها من النعس
وقفو ايه وسامر بصو لبعض بعدين بصولها
" ايه يا لولو صباح الخير انا لسه داخله كنت اصحيكي حالا "
" صباح النور بليل هيا الساعه كام "
" 10 ونص "
" طب بصي بابي كلمني صحاني "
" في حاجه ولا ايه "
" لا ابدا بس بيقولي انه انهردا عنده شغل كتير اوي صعب يرجع انهردا البيت ورفض اني انام لوحدي في البيت تسمحيلي معلش انام معاكي انهردا "
" طبعا يابنتي البيت بيتك انتي بتتكلمي في ايه انتي اختي ياريت اصلا كل يوم "
" ربنا يخليكي حببتي "
سامر سمع الجمله دي وحس انه طاير من الفرحه معقوله انا وهيا في بيت واحد نايمين مفيش مابينا غير حيطه بس
" مالك ياسامر سرحان في ايه "
" لا ابدا يا الاء مفيش "
" اتدايقت اني هنام عندكو انهردا "
" لا طبعا دي حاجه تفرحنا كلنا البيت بيتك زي ما ايوي قالتلك تنوري في اي وقت "
" ماشي يا صاحبي " وغمزتله بهزار
" هههههه ماشي ياصاحبي .. يلا منك ليها عالمذاكره بلاش دلع "
" ماشي ياخويا بقولك ايه ابأه قول لماما تعمل العشا وتنده علينا ماشي "
" حاضر "
ودخلت ايه والاء الاوضة وسامر متابع الاء خطوه بخطوه
سامر دخل على مامته الاوضه وهوا مبتسم
" ايه ياحبيبي تعالى "
" ماما كنت عايزك في موضوع كدا "
" اؤمرني عنيا ليك "
" ربنا مايحرمني منك ابدا ياست الكل .. بقولك ايه انا عايز اخطب "
" تخطب؟؟ يا الف نهار ابيض ومين هيا بأه اللي خدت عقلك وقلبك دي "
" واحده انتي تعرفيها وتعرفيها كويس اوي كمان "
" اعرفها !! تكونش سالي بنت خالتك ؟ "
" سالي ايه بس يا ماما ركزي معايا شويه "
" ايه يابني قول جننتني معاك الله "
" الاء "
ليست هناك تعليقات:
إرسال تعليق