نزلو هما الاتنين والسكون سيد الموقف .. محدش فيهم قادر يبص في عين التاني .. لحد ما وصلوا عربيه باباها
سامر سلم على باباها وعليها وطلع البيت
دخل اوضته وحط دماغه عالسرير وقلبه فضل يدق جامد اوي ومش قادر ينسى وشها ولا ريحتها ولا لمسته ليها ولا احساسه بالخوف عليها وهيا تعبانه ولا احساسه وهوا واخدها في حضنه
ياااااااااااااه اد ايه انا بحبها واد ايه بخاف عليها واد ايه نفسي فيها بس هيا ولا هنا
...
فضل كدا لحد ما نعس وراح في النوم
الناحيه التانيه عند الاء وباباها
ركبت الاء العربيه مع باباها وفضلت باصاله وهيا مش مصدقه انها شايفاه قادمها
" كل دا ياحبيبت بابي برا البيت ؟ "
" بابي انتا كويس؟؟؟؟؟ "
" اه يا الاء كويس مالك فيكي ايه حاسس انك مش طبيعيه "
" لا ابدا مفيش "
" اتكلمي ياحبيبتي مالك "
فضلت الاء تفكر معقوله تكون مرات باباها عملت فيها كدا عشان تقولها مش انا اللي تتكلمي معاها بالطريقه دي !!؟
معقوله تفكر التفكير دا !؟ ومجاش على بالها انها بعد ماتفهم تحكي لباباها !!
مبأتش عارفه تحكي لباباها ولا تسكت
ولو حكت هتحكي ايه !!
ولو سكتت هيحصل تاني فيها ايه
قرتت انها تحكيله كل حاجه من اول يوم دخلت فيه الست دي بيتهم
" بابي ممكن اطلب منك طلب "
" عيون بابي "
" بكرا الجمعه مفيش شغل ممكن تخلينا نقعد في اي حته برا شويه محتاجه اتكلم مع حضرتك شويه "
" حاضر ياحبيبت بابي بس منأخرش عشان هصحى على صلاة الجمعه "
الاء ابتسمتله من غير كلام وريحت ضهرها على الكرسي اللي جنب باباها في العربيه وغمضت عيونها وافتكرت كل لحظه بينها وبين مرات باباها
وبعد تقريبا ربع ساعه
" لولو ياحبيبي انتي نمتي "
" لاء يابابي انا صاحيه بس سرحت وكنت عايزه ارتاح ف قفلت عنيا "
" طيب ياحبيبت بابي يلا وصلنا "
نزلو من العربيه قعدو قصاد الكورنيش بالعربيه ..
" ها يابنوتي الجميله .. احكيلي كل اللي نفسك تحكيه انا انهردا ملك ليكي وحدك "
" مش عارفه احكيلك ايه ولا ايه يابابي "
" احكيلي اللي نفسك تطلعيه انا سامعك "
" خايفه "
" مني !؟؟؟؟؟؟ معقوله يا لولو تخافي من بابي حبيبك "
" مش منك يابابي "
" اومال ايه ياحبيبتي !؟ بتحبي يابنوته ولا ايه "
" لا يابابي حب ايه بس .. "
" طب يبأه مفيش حاجه اكتر من كدا .. احكيلي يابنتي يلا "
" مراتك يا بابي "
اول ما سمع الكلمتين دول وشو اتقلب وبص في السما
" مالها "
" مش بحبها "
" ليه ياحبيبتي "
" بابي الست دي بتكرهني اوي .. بتعاملني وحش اوي من يوم ما جت البيت ولما حضرتك بتيجي البيت بتعمل انها كويسه معايا عشان عارفه انك مش متجوزها عشانها بس عشاني .. ولانها عايزاك وخايفه انك تبعد عنها بسببي بتعاملني قدامك كويس .. انا تعبت يابابي ومش عارفه لا اذاكر ولا اعمل اي حاجه .. جبتهالي عشان تاخد بالها مني مع اني من غيرها كنت عارفه اعيش كويس "
" ليه مقلتليش الكلام دا كلو قبل كدا "
" عشان مكنتش عايزه اشيلك هم فوق همومك "
" الاء انتي اهم عندي من الدنيا دي انا اعمل اي حاجه عشانك ياعيون بابي "
" بابي عارف انا ليه لحد دلوقتي عند ايه "
" ايوا انتي قلتيلي هتفضلي معاها بس مكنتش اتوقع انك كل دا تبأي برا البيت "
" ماشي .. اقرا كدا الورقه دي "
زدخلت ايدها في جيبها طلعت الورقه اللي مرات باباها كاتباها واديتها لباباها
اول لما قراها بصلها ومبقاش عارف يقول ولا يعمل ايه
مش فاهم حاجه وقبل ما يتكلم كانت الاء سبقتو في الكلام
" الكلام دا بخط مرات حضرتك يابابي "
" ازاي يا الاء انتي عارفه ممكن يحصل ايه بسبب الكلام دا "
" ايوا عارفه ومكنتش ناويه اتكلم بس انا عايشه في نار يابابي والله وتعبانه ومش عارفه اعمل ايه "
" احكيلي طيب اللي حصل انهردا كلو بأه "
بعد ما الاء حكتلو كل حاجه من بداية يومها لحد اللحظه اللي قاعدين فيها سوا دي ..
قام واخدها في حضنو وفضل يطبطب عليها وهوا عارف انه السبب في كل حاجه بس بردو حاسس ان بنته مقدره موقفه ومش جايبه لوم عليه
" سامحيني يا الاء "
" سامحني انتا يابابي انا السبب في كل حاجه لولا وجودي مكنتش تشيل هم ولا كنت تتجوز عشان حد ياخد باله مني "
" لا ياحبيبت بابي انتي احلى حاجه في دنيتي دي .. انا اللي هقدر اخد بالي منك بنفسي يا اجمل بنوته شافتها عنيا .. "
" متبعدنيش عنك يابابي انا محتاجاك اوي جنبي "
" ابعد عن كل الدنيا دي وانتي لاء ياعمري انا .. اما هيا .. فـ من انهردا مش هتشوفيها تاني .. اوعدك يابنتي "
ومسك ايدك بتحها وباسها في كف ايدها
" بحبك يااحلى بابي في الدنيا "
" وانا بحبك يا اغلى عندي من الدنيا دي "
" يلا نروح انا نعسانه اوي يابابي وعندي مذاكره للصبح وانتا عندك بكرا صلاه "
" ماشي ياحبيبت بابي يلا بينا "
دخلوا العربيه وحطت الاء راسها عالكرسي وغمضت عينها وحست انها اخيرا ارتاحت من كل همومها
وحستش بنفسها .....
وصلوا البيت ولما باباها لقاها نعست لف الناحيه بتاعتها وشالها وقفل الباب وطلع البيت
نيمها على سريرها وغير هدومه ورجع اوضتها خدها في حضنه ونام
تاني يوم الصبح مرات باباها صحيت ملقتهوش في الاوضه بصت في الساعه لقيتها 10
" الله غريبه هيكون راح فين لسه الصلاه مبدأتش "
قامت من سريرها وبصت في المرايه عدلت شعرها وطلعت من الاوضه دورت عليه ملقتوش
قعدت قدام التليفزيون شويه وفجأه لقيت الاء وباباها طالعين من الاوضه بتاعت الاء
اول لما شافوها كشروا وبصوا لبعض
وهيا استغربت جدا من الحركه دي وعملت نفسها مش واخده بالها
" صباح الخير ياحبايبي ثواني والفطار يكون جاهز "
" الاء حضرتلي انا وهيا الفطار وكلنا الحمدلله "
" والله طب بالهنا والشفا "
" انتي طالق "
" انتا بتقول ايه !!!!!!؟ "
" زي ماسمعتي كدا "
بصت لـ الاء والاء محبتش تحضر الموقف دا .. جت تدخل اوضتها باباها قالها تستنى
" خليكي يا حبيبت بابي .. مش انتي اللي المفروض تمشي "
" يعني ايه !! انتا ازاي تطلقني "
" اظن انتي سمعتي الكلمتين دول وعارفه كل حاجه اتعملت في بنتي منك .. مش محتاج احكيلك ...
من انهردا مشوفش وشك تاني والمؤخر هيتدفعلك عالجزمه .. في ظرف نص ساعه تكوني لامه كل هدومك وحاجتك .. ارجع من الصلاه ملقاكيش هنا .. وحسك عينك تقربي منها واظن انتي عارفه ممكن يحصلك ايه "
" عملتيها فيا بابنت ابوكي "
" انتي بتكلمي مين كدا .. غوري من خلقتنا يلا "
" بس ياحبيبي .. "
" حبيبك؟ ههههههههه .. من غير محلسه طيب عشان انا مش مراهق قدامك وهتضحكي عليا بكلمتين ..
ارجع من صلاة الجمعه ملقاكيش هنا "
وبص لـ الاء لقاها باصه في الارض
رفع راسها وبصلها
" بنتي متنزلش راسها الارض ابدا طول مانا عايش سامعه ياحبيبت بابي "
" حاضر يابابي "
" ياعمر بابي انتي .. يلا روحي ذاكري يابنت مش عايز دلع انا عايز مهندسه في البيت دا "
" اوعدك يابابي هشرفك "
" وانا واثق في حبيبة بابي "
وباسها على راسها ودخلت هيا اوضتها وقفلت الباب على نفسها
باباها كان واقف وطليقته لسه واقفه باصه عليه .. اول لما بصلها
" انتي لسه مكانك ياست انتي !!؟ "
" ست انتي ؟ انتا مشترتنيش عشان تعاملني كدا "
" انا ادي اي حد بالجزمه ممكن بس انو يفكر مجرد تفكير يمس شعره مش شعر الاء بنتي .. وانتا ماشالله اتعديتي حدزدك .. كنت واثق فيكي والبنت من أدبها كانت ساكته مش راضيه تحكيلي بس لاء جدعه على حركة امبارح خليتيني افهم كل حاجه "
" انا بعمل كل دا عشان بحبك وبغير عليك منها "
" ههههههههههه استغفر الله العظيم عالستات ياربي "
" ستات ؟ "
" وانتي راجل ولا ايه؟ يلا ياستي من هنا .. ارجع من الصلاه ملقاكيش مع الف سلامه ورقة طلاقك ومؤخرك هيوصلولك في خلال يومين تلاته بالكتير "
وسابها ودخل اوضته غير هدومه واتوضى ونزل عالمسجد يصلي الجمعه
في اوضة الاء بعد مادخلت الاوضه حطت دماغها عالسرير وغمضت عنيها واول لما غمضت اول حاجه شافتها كانت وش سامر !!! "
ليست هناك تعليقات:
إرسال تعليق