نزلت الموبايل من على ودنها وبصتلها ..
" نعم ؟ "
" ارتاحتي في النوم امبارح "
" الحمدلله طبعا ارتحت مش كنت في حضن بابي !! "
" بابي دي تقوليها لما هوا يبأه هنا .. متتكلميش عنو كدا قدامي سامعه "
" انتي بتقولي ايه "
" بقول اللي سمعتيه ايه مش عاجبك .. "
" لاء مش عاجبني .. دا بابي قبل ما يكون جوزك ولولا مامي الله يرحمها سابتنا لولا اتجوزك "
في اللحظه دي الاء حست من جواها انها قويه اوي ومش عارفه جابت القوه دي منين وفي نفس الوقت مرات باباها اتفرست منها جدا لانها عارفه ان كلامها صح وان جوزها مبيحبهاش واتجوزها بس عشان تاخد بالها من الاء عشان كدا بتكرهها وبتعاملها وحش
طلعت من اوضة الاء وهيا بتقول بعلو صوتها
" يانا يانتي في البيت دا "
الاء بينها وبين نفسها:
" هههههههههه تبأي غلطانه لو اتخيلتي للحظه ان بابي ممكن يفضلك عليا "
ورجعت حطت الموبايل على ودنها
" سوري يا ايوي بس دخلت عليا فجأه "
" انتي عظيــــــــــــــمه هههههههه "
" ههههههههههه انتي سمعتي اللي حصل "
" اه سمعت بس انتي جتلك الشجاعه دي منين والله جدعه تعجبيني ايوا كدا "
" مش عارفه والله يا ايوي بس انا حاسه ان نومي في حضن بابي الليل كلو هوا اللي اداني الشجاعه دي .. "
" سيبك انتي .. كنتي جامده "
" هههههههه تصدقي بأه هتعامل معاها كدا من هنا ورايح لحد اما تطفش من البيت دا "
" جدعه يا لولو .. ذاكرتي ولا لسه "
" لاء لسه دنا حتى لسه هفطر اهو "
" طب ايه رأيك انهردا ننزل نقعدلنا في اي كافيه "
" اممممم ايوا انا محتاجه اغير جو شويه "
" طب تمام هستناكي على 6 كدا اشطه "
" تمام يا باشا "
قفلوا مع بعض وكل واحده قعدت تذاكر ولما جت الساعه 5 الاء اتصلت استأذنت من باباها انها تنزل وهوا وافق .. قامت لبست وخلصت وفتحت باب اوضتها وطلعت .. دخلت المطبخ تشرب ميه لقت مرات باباها في المطبخ
شربت الميه وهيا قرفانه وجايه تطلع
" رايحه فين ياهانم دلوقتي "
الاء ابتسمت وسكتت
" مش بكلمك "
" اسمي الاء .. لما تناديني باسمي هبأه ارد "
" انتي ازاي تتكلمي معايا كدا "
" انا تعبت من تصرفاتك معايا ومخلياني شغاله في البيت وانا عندي مذاكره وثانويه عامه ومفيش حد في الدنيا دي هيقدر يأثر عليا ويضيع مجهود السنه اللي فاتت والسنادي في الارض انسي "
" انتي بتقولي ايه "
" بقول اللي حضرتك سامعاه .. انا بحترمك لانك مرات بابي مش اكتر وساكته وصابره بردو عشان بابي مش اكتر ومش عايزه احكيله حاجه مش عشان هوا مش هيصدقني لاني انا وحضرتك عارفين انو هيصدقني وفي لحظتها هيطلقك عشان كدا بتتعاملي معايا كويس وقت ماهوا بيكون موجود لانه لو حس مجرد احساس اني مش مرتاحه هيبأه ليه معاكي تصرف تاني بس انا بعمل كل دا لاني مش عايزه اشغل باله عليا كفايه هوا تعبان في الشغل وكفايه هوا قلقان دايما عليا من غير حاجه وكفايه ان مامي الله يرحمها بعدت عنه يوم ما سابتنا وربنا اراد انه ياخدها عنده فـ معنديش استعداد اعكنن عليه حياته اكتر ما هيا .. هوا دا السبب الوحيد اللي مخليني ساكته عاللي بتعمليه لكن من هنا ورايح انا مش هسمع كلامك انا ههتم لمذاكرتي ولو حضرتك السبب في فشلي انا مش هسمح بكدا وبابي هيعرف فـ براحتك "
" انتي بتهدديني !؟ انتي اتجننتي يابت انتي ولا ايه "
" اعتبريه اللي عايزه تعتبريه .. عن اذنك انا ماشيه ... اه وعلى فكره انا استأذنت من بابي على نزولي دا .. مش انا اللي تعمل حاجه من ورا باباها "
وسابتلها البيت كلو وطلعت وجواها فرحه كبيره اوي انها قدرت تبأه اخيرا قويه قدام مرات باباها
في الناحيه التانيه كانت مرات باباها قاعده بتولع .. اتصلت بجوزها وقالتله الاء قلت ادبها عليها وهوا مصدقهاش وقالها خلاص انا هتصرف لما اجي من الشغل لاني مشغول دلوقتي اوي .. قفلت معاه وهيا متعصبه اكتر وهتموت وتلاقي حاجه تعملها تخلي الاء تندم عاللي عملتوا بيها
وصلت الاء لـ ايه وخدتها ونزلوا راحوا كافيه قريب من بيوتهم
بعد ماقعدوا وطلبوا .. وهما قاعدين كانت الاء بتحكي اللي حصل وهيا نازله لايه
وايه فضلت تضحك عالموقف وهيا مبسوطه ان الاء اخيرا قدرت توصل لانها تقوي قلبها شويه وتفوق لنفسها ومتستسلمش
فجأه الاء سكتت وسرحت .. ايه حست ان الاء عنيها فيها حزن كبير وفهمت سببه
" الاء "
" نعم "
" مالك "
" وحشني اوي يا ايه "
" مش ناويه تنسي بأه يا الاء "
" انسى ايه ولا ايه بس يا ايه انا شفت اللي محدش شافه .. كل اللي بحبهم سابوني ومفيش معايا غيرك "
" هوا مكلمكيش تاني ؟؟ "
" لاء مكلمنيش منا حاكيالك من ساعة ما اتخرج واشتغل السنه اللي فاتت وهوا سابني وخطب البنت اللي باباه فرضها عليه .. وطبعا انا مقدرش اكلمه من بعدها .. سنه ونص راحوا من عمري على مفيش يا ايه .. اول حب في حياتي مات "
" لسه عايزاه يا الاء؟ "
" هتصدقيني لو قلتلك لاء؟ انا بس عايزه انساه مش اكتر .. سنه ونص بحبه وسنه بعيده عنه .. ولسه مش قادره انسى "
" يمكن عشان سبتو بعض عن حب "
" يمكن!!! "
" طب انسي يا الاء وخلينا في مذاكرتنا .. بكرا ندخل كليه وتنسي كل حاجه وتحبي وتتحبي بجد "
" مبأتش عايزه والله يا ايه اعرف حد خلاص .. وزي مانتي شايفه كل اما حد يحاول يكلمني بهرب منه "
" يارب تنسي ياحبيبتي يارب "
" يارب "
فضلوا قاعدين شويه مع بعض بعدين روحوا عالبيت واتفقوا يكملوا مذاكره والاء متفكرش ف حاجه
دخلت الاء البيت ملقيتش مرات باباها .. قالت في نفسها الحمدلله
دخلت اوضتها ولسه بتغير هدومها لقيت ورقه محطوطه على مكتبها
بصت فيها ولقيت كلام غريب مكتوب فيها .. مقدرتش تفهمو ..
قرأته مره واتنين وتلاته ..
وفـ لحظه مسكت موبايلها واتصلت بمرات باباها .. مبتردش!
اتصلت بباباها .. بردو مش بيرد!!
حاولت تتصل بيهم كتير محدش فيهم بيرد
معرفتش تعمل ايه .. فضلت تعيط جامد اوي
وجسمها بيترعش وهتموت من الخوف .. بتعيط وبتقرا الورقه من تاني يمكن تكون فهمت غلط
بس مفيش فايده! .. كل ما تيجي تقرا الورقه .. هوا هوا نفس الكلام!!!!!
طلعت من اوضتها جري ودخلت اوضة باباها ملقيتش حد
فضلت تنده على باباها وهيا بتعيط لحد ماوقعت على الارض وهيا بتعيط ولسه بتنده عليه
وجواها صرخه واحده بتطلع من جواها .. اااااااااااااااااه
سمعت صوت موبايلها بيرن في الاوضه
جريت عليه وحاولت تمسك نفسها على أد ما تقدر لحد اما توصل للاوضه
لقيت ايه بتتصل بيها
مقدرتش ترد وفضلت تصرخ .. ايه فضلت تتصل بالاء والاء مبتردش
وعلى اخر حاجه الاء ردت وهيا بتعيط
" الاء في ايه خضيتيني عليكي انتي مبترديش ليه!!!!!!!!؟ "
الاء لسه هترد محستش بنفسها ووقعت من طولها
ايه فضلت تقول الو ومش سامعه صوت من عند الاء .. قلقت عليها واتصلت عالبيت بردو محدش بيرد
راحت قالت لمامتها انها هتروح تشوف الاء مالها ومامتها قالتلها تاخد سامر اخوها الكبير معاها لان الوقت اتأخر
دخلت ايه على سامر في الاوضه وقالتله يجي معاها ..
سامر كان بيحب الاء واول ما سمع كلام ايه اتجنن وفي لحظه غير هدومه وخد ايه ونزلوا على بيت الاء
فضلوا يخبطوا عالباب محدش فتح
نزل سامر للبواب تحت وقالو يطلع معاه يشوف ايه الحكايه
طلع سامر والبواب وحاولو يفتحو باب الشقه ويخبطوا عالباب لحد اما فضلو يزقووه .. واتفتح
جريت ايه على اوضة الاء وقلبها بيدق جامد اوي
اول ما دخلت الاوضه صرخت ..
سامر جري عليها لقى الاء في الارض مغم عليها
حاولو يفوقوها ودي مفيش فايده .. مسكها سامر من ضهرها وشالها على ايده وحط ايده التانيه تحت رجلها وضمها ليه وقال لـ ايه تجيب شوية ميه
طلعت ايه وجابت ميه من المطبخ ورجعت كان سامر حط الاء على السرير وحط تحت رجلها مخده وقام يدور في الاوضه على برفان
مسك الازازه ورش شويه على ايده وقربها من وش الاء .. اول ما سامر عمل كدا الاء كحت وفاقت
دخلت ايه بالميه لقيت الاء بتكح جريت عليها وخدتها في حضنها وهيا بتعيط
فجأه الاتنين بدأو يعيطو وهما في حضن بعض والاء تضم في ايه تمسك في لبسها زي الاطفال وخايفه
سامر لما شاف المنظر دا قلبه وجعه اوي على الاء وكان نفسه هوا اللي يحضنها ويخفف عنها كل وجعها
ايه بعدت عن حضن الاء ومسحت دموعها وبصتلها
" في ايه يا الاء "
الاء بصت عالارض لقيت الورقه شاورت عليها من غير كلام
ايه مسكت الورقه وقرأتها وحطت ايدها على شفايفها وشهقت !!
ليست هناك تعليقات:
إرسال تعليق