بصت بسرعه في الارض وراحت قدمتلهم الشربات وسلمت عليهم وقعدت
" دي بأه هيا عبير .. بنتي الكبيره "
" ماشالله ربنا يخليهالكم .. ابني فعلا عرف ينقي صح الف مبروك عليكو ياولاد "
" الله يبارك فيك يا بابا "
" طب ياعبير قومي يلا مع عريسك اقعدو في الصاله واتعرفو على بعض "
عبير كانت هتموت من الكسوف وبصت لباباها وابتسمتله وقامت
وقام وراها ياسر وقعدو سوا في الصاله ..
" ازيك ياعبير "
" الحمدلله "
" بصراحه بأه انا من لما انتي كنتي في سنه اولى وانا بسمع عنك كل خير بس مكنتش واخد بالي منك والسنادي بدأت اتابعك ودايما بسأل عنك من وقتها وانا معجب بيكي جدا واستنيت الوقت المناسب ولما اتأكدت انك مش مرتبطه جيتلك على طول عشان اخد رقم والدك عشان متفتكريش اني جاي اصاحبك والعب واتسلى "
عبير كل دا باصه عليه شويه وعلى الارض شويه وسامعاه ومرتاحه جدا ..
" وانا ياستي السنادي اخر سنه ليا وناوي انشالله ابأه معيد في الكليه واشرفك واشرف عيلتك .. "
" جميل اوي "
" ممكن تحكيلي عنك "
" اممم عبير .. تالته السن ... "
" لالالا عارف انا الكلام دا .. احكيلي عن حياتك .. شخصيتك .. كدا يعني "
" ااه .. بص بصراحه انا كنت مرتبطه بواحد لمدة سنتين ونص تقريبا وانتهت .. قبل ما ادخل تالته ثانوي .. يعني كان حب مراهقه بس عمر ما كان بينا اكتر من سلام الايد وكلام في التليفون وتقريبا السنتين ونص دول كنا مع بعض سنه واحده بس فيهم الباقي كان كل واحد في حالو ... انا هاديه واصحابي قليلين .. وبحب ماما وبابا ودنيا جدا .. اممممم وايه تاني !! "
" مبسوطه في حياتك "
" يعني .. الحمدلله "
" اما انا بأه فـ بجد مبسوط اني عرفتك وقربت منك واخترتك .. انا اسعد انسان في الدنيا ياعبير .. ربنا رزقني بيكي الحمدلله "
اتكلمو سوا كتير وعرفو بعض وقربو من بعض ..
وخلصو كلام ومشي ياسر وباباه ومامته
واتفقو تبأه الخطوبه الخميس الجاي
" الف مبرووووووك يابيروووووو "
" ههههه الله يبارك فيكي يادندونتي عقبالك ياحبيبي يارب "
" مبروك يابنتي الف مبروك وبصراحه الناس فعلا محترمين "
" الله يبارك فيك يا بابا اهم حاجه رضاك انتا وماما "
" بصراحه يابيرو انا مرتحالهم جدا ومامته ست محترمه اوي الف مبروك ياحبيبتي "
" الحمدلله يا ماما دا بالنسبالي كل حاجه انكو ترتاحو مع بعض الله يبارك فيكي يارب يامامتي عقبال ماتفرحي باحفاد احفادك "
عدى الاسبوع بسرعه وكل يوم عن يوم عبير بتتعلق بياسر اكتر
وكل واحد فيهم عزم صحابه على الخطوبه
يوم الاربع بليل نزلو واختارو الشبكه والدبل وروحو
وجه الخميس ..
انهردا خطوبة عبير على ياسر .. !
صحيت عبير من النوم بدري وجتلها رحاب عشان تساعدها
اتغدو سوا في البيت ونزلو ومعاهم دنيا على الكوافير عشان يجهزو
في الكوافير كانت عبير بتجهز وبتخلص ودنيا ورحاب كانو خلصو ومستنينها
شويه ودنيا موبايلها رن .. رقم غريب !!
" الو .. ايوا مين معايا "
" ازيك يادنيا ممكن اكلم عبير "
" ممكن اعرف حضرتك مين "
" معلش دي مفاجأه اديها بس الموبايل "
" اممم طيب حاضر "
دنيا راحت لعبير ادتها الموبايل وقالتلها حد عايزها
" الو ؟ "
" وحشتيني ياعبير "
عبير سمعت الصوت من هنا وحست انها مش طبيعيه
حست كل مكان من جسمها بيترعش !! حست انها مش على بعضها
وانها دايخه جدا ..
قعدت على الكرسي وحاولت تستوعب اللي بيحصل وعلى الموبايل لسه الصوت بيقول الو
حاطه الموبايل على ودنها وحاسه انها مش سامعه غير الصوت اللي جاي من الموبايل
" ايوا .. مين معايا "
" عبير نسيتي صوتي !! نسيتي صوت حبيبك "
" لو سمحت .. مين معايا "
" ميمو ياعبير .. انا ميمو .. محمد "
" اسفه انا مضطره اقفل "
وقفلت في وشه
رحاب ودنيا بصولها وهما مش فاهمين حاجه
وهيا قاعده مش شايفه قدامها ومسهمه
" مين ياعبير "
" عبير ردي علينا مين دا "
" هيا مش سامعانا ولا ايه "
" مش عارفه والله يادنيا .. عبيير ؟؟؟؟ "
" تفتكري مين يكون اللي اتصل دا "
" ياخوفي يكون هوا "
" محمد ؟ "
اول لما دنيا قالت الاسم دا عبير بصتلها
" ايوا هوا !!!!!! "
دنيا ورحاب بصو لبعض ومبقوش مصدقين
" ودا عايز ايه دلوقتي دا "
" مش عارفه .. انا قفلت في وشه اصلا .. دنيا هوا الرقم دا منين "
" من هنا .. رقم مصري "
" يبأه جه مصر .. وافتكرني .. وعشان انا مغيره رقمي اتصل على رقم دنيا "
" حاسه بـ ايه ياعبير "
" تصدقي بالله يارحاب .. مش حاسه باي حاجه "
" مش متدايقه .. ؟ "
" بالعكس .. انا مبسوطه اوي .. انهردا ليلة خطوبتي ... انا دلوقتي بس اتأكدت انو مبقاش في بالي .. للابد خلاص "
" دنيا اقفلي موبايلك عشان ميتصلش تاني "
" حاضر يارحاب "
قفلت دنيا موبايلها وخلصو البنات وطلعو من الكوافير وكانت العربيات مستنياهم
ياسر اول لما شافها ابتسم وقلبه بدأ يدق بسرعه اوي ..
حس انه طاير من الفرحه !!
اتقدملها ومسك ايدها وباسها عليها
وقرب من ودنها وهمس
" ايه القمر دا بس "
" امممم بس يا ياسر متكسفنيش "
" ههههه حاضر "
ركبو العربيات وبدأت الزفه لحد ماوصلو للقاعه ..
كانو اصحابهم مستنينهم ودخلو على القاعه كلهم وبدأت الخطوبه
وعبير وياسر حاسين انهم مبسوطين اوي .. وخصوصا عبير اللي ارتاحت لما لقت نفسها لا اراديا بتصد محمد
وكأنه واحد غريب متعرفهوش ومتصل يعاكسها
اول لما افتكرت الموقف ابتسمت
" قوليلي بأه ايه سر الابتسامه الرقيقه والجميله اوي اللي على شفايف خطيبتي دي "
" اممم هحكيلك بعدين بس اهم حاجه اني بجد .. بجد مش مصدقه نفسي يا ياسر "
" مبسوطه ؟؟ "
" اوي اوي بجد . وانتا؟ "
" مفيش مخلوق اسعد مني في اللحظه دي "
شويه وراحو يدولهم الدبل عشان يلبسوها
ياسر مسك دبلة عبير ومسك ايدها ودخل الدبله في صباعها وقرب منها
" لاول مره هقولهالك .. بحبك ياعبير "
عبير حست انها داخت من الكلمه ومسكت على ايده جامد
رجع لورا وبصلها لقى على وشها ابتسامة رضا جميله اوي
ارتاح جدا وفضل ماسك ايدها
مسكت دبلته وحطتها في صباعه وبصتله
جت عيونهم في عيون بعض
وهمست بشفايفها " بحبك "
حست بجد بمعنى الكلمة لاول مره .. مع انها قالتها كتير قبل كدا لمحمد
بس دي كانت اول مره تحس ان كل كيانها بيقول كلمة بحبك
حست قلبها بيقول بحبك قبل شفايفها
مسك ايدها وباسها عليها بكل رقه وبصلها وابتسم
في اللحظه دي مامت ياسر ومامت عبير بدأو يزغرطو ويباركولهم
في الناحيه التانيه
محمد قاعد في اوضته بيلف حوالين نفسه
قاعد بيتصل برقم دنيا مغلق
طلع من اوضته ونده على احمد ودخل تاني
دخل احمد عليه
" مالك ياميمو "
" هتجنن .. بجد هتجنن عبير وحشتني خلاص مش قادر "
" لسه دنيا قافله الموبايل "
" ايوا لسه .. بقولك ايه انا رايح على بيتهم اتقدملها دلوقتي حالا ولو وافقوا من بكرا اخد بابا وماما معايا "
" ايه الجنان دا يابني "
" اهو زي مابقولك كدا "
" يامحمد مش شايف الساعه بأت كام .. الساعه 12 ونص "
" ولا يهمني "
وخد موبايله ونزل
خد تاكسي وطلع على بيت عبير
واول ما وصل تحت بيتها لقى زفه كبيره اوي جايه من بعيد
بص عليها وابتسم
" عقابلنا يا احلى بيرو "
قربت الزفه وهوا لسه هيطلع ونزلت العروسه
وجت عيونه عليها
" عبييييييييير !!!!!!!!!!!!!!!!!!!!؟ "
عبير بصت لقيته قدامها اتصدمت !!
الكل اتصدم .. دنيا و رحاب وياسر ومامت عبير
" مين دا ياعبير .. "
" هوا دا محمد يا ياسر !! "
" و ايه اللي جايبو هنا وعايز ايه "
" معرفش والله ما اعرف "
قرب محمد عليهم وعيونه مليانه دموع وبصلها وابتسم ابتسامه مجروحه
" ازاي يا عبير "
عبير فضلت ساكته والكل ساكت اللي فاهم ومصدوم واللي مش فاهم وبيتفرج!
" ازاي يا عبير دنا انهردا جاي اتقدملك .. ازاااي "
بصتله عبير وجت عيونها في عنيه .. شافت دموعه وابتسمت
وحست انها فعلا مش حاسه بأي حاجه من ناحيته
مسكت ايد ياسر وبصتله ورجعت بصت لمحمد
" جيت متأخر اوي ... "
النهـــــــــــــــايه :)
حلوه اوي اوي اوي :)
ردحذف.... فيروز :)
محمد صعب عليا :((
ردحذفاحيييييييييييييه جامده جدابس ليه كل القصص فيها حاجات حزينه كدا بجد صعب عليا ااوووووووى ياريت يبقى فى ىقصه كدا كلها حبو تفائل وميكونش فيها حزن تسلم ايدك
ردحذفجميله اوى بس محمد ده صعب عليا جدا حرام والله
ردحذفالنهايه مش لطيفه
ردحذفبس طبعا قصه حلوه
ردحذفبس محمد طلع كويس ف الاخر
ردحذف