نرمين واحمد بصوا لقوا وليد جاي من بعيد
احمد همس في ودن نرمين انها تسيطر على اعصابها ومسك على اديها جامد
في كل خطوه وليد بيمشيها ناحيتهم احمد بيمسك اكتر على ايد نرمين ونرمين ضربات قلبها بتزيد اكتر واكتر
وليد وصل لحد الكوشه عندهم ومن بعيد سـلمى وسـهام واقفين متابعين الموقف
وليد ماشي بكل ثقه وابتسامه واول ما وصل مد ايده لاحمد
احمد مد ايده وسلموا على بعض
وليد بابتسامه: الف الف مبروك
احمد: شكرا الله يبارك فيك
وليد بص لنرمين وابتسم اكتر: مبروك ياعروسه
احمد بسرعه مسك على ايده جامد: شكرا ياوليد
وليد: طيب استأذن انا .. انا قلت بس اجي اعمل الواجب
احمد: كلك زوق وليك في الاصول متشكرين
ومشي وليد .. وعيون احمد متابعاه خطوه بخطوه لحد ما طلع برا القاعه
اول ما طلع احمد خد نفسه بارتياح
سـهام وسـلمى جريوا على نرمين واحمد
سـهام: في ايه
سـلمى: قاللوكو ايه
نرمين: اهدوا يابنات مفيش حاجه حصل خير
احمد: محصلش حاجه ياحبايبي هوا جه يسلم علينا ويبارك بس مش اكتر
سـهام: طب انتا كويس؟
احمد: اه ياحبيبتي كويس يلا روحوا لكريم وكمال
بعد ما سـهام وسـلمى مشيوا
احمد: مالك ياحبيبتي
نرمين: كل دا بسببي انا!! انا اسفه بجد
احمد: لا ياحبيبي مفيش حاجه انسي محصلش حاجه
نرمين: بجد
احمد باسها على راسها وبصلها فـ عنيها وابتسم
احمد: وحياتك بجد
خلصت الليله على خير وطلعوا من القاعه وفضلوا يلفوا بالعربيات شويه يزفوهم وبعد كدا كل واحد روح على بيته
فاتوا 5 ايام يوم بيجيب يوم ومفيش اي جديد غير ان سـهام وسـلمى بينزلوا يجيبو الفساتين وبيشوفوا القاعه مع كريم وكمال
لحد ما اخيرا اختارت كل واحد فستانها وكانوا شبه بعض جدا الفستانين .. واختاروا القاعه ونظموا كل حاجه
اليوم السادس يوم الاربع بليل ..
احمد: سـلمى
سـلمى طلعت من الاوضه وراحت اوضته
سـلمى: ايوا يا احمد في حاجه؟
احمد: متعرفيش مالها نرمين؟ انهردا كلو بتصل بيها مش بترد انا قلقت جدا عليها حتى على تليفون البيت مش بترد
سـلمى: لا والله ياحبيبي مش عارفه طب متروحلهم البيت تطمن عليها
احمد: السعه 12 ياسـلمى اروح فين بس دلوقتي .. طب بصي حاولي تكلميها انتي كمان
سـلمى: هوا انتو متخانقين ولا ايه
احمد: لا ابدا والله امبارح كنا كويسين سوا لحد ما قفلنا ونمنا وانا انهردا نزلت على شغلي واديكي شايفه راجع من ساعه وبتصل بيها ومش بترد واتكسفت اروح البيت في الوقت دا
سـلمى: خلاص هشوفهالك ولو في حاجه هقولك
احمد: ماشي
سـلمى طلعت من الاوضه واحمد قاعد قلقان جدا ومتوتر
بعد ما سـلمى دخلت اوضتها لسه هتكلم كريم موبايلها رن
نرمين بتتصل بيها
سـلمى: الو
نرمين: ايه يابنتي الطناش دا فينك كدا مش بتسألي
سـلمى: معلش ياحبيبتي والله مشغوله جدا انا وسـهام في حوار الفساتين دا
نرمين: وخلصتوا؟
سـلمى: اه اخيرا اخترنا الفساتين والقاعه
نرمين: مبروك ياحبيبتي
سـلمى: عقبالك يارب
نرمين: سـهام فين
سـلمى: اهي جنبي اهي
نرمين: طب افتحي المايك عايزه اقولكم حاجه
سـلمى فتحت المايك
سـهام: نرمين عامله ايه
نرمين: الحمدلله ياسمسم انتي ازيك
سـهام: اهو تمام الحمدلله
ترمين: مبروك عليكي الفستان خلاص يابنات الخميس الجاي الفرح؟
سـهام: اه انشالله الله يبارك فيكي
نرمين: طب بقولكم ايه
سـلمى: هاا قولي
ولا استني صح دا احمد قالب عليكي الدنيا انتي فينك يابنتي مختفيه
نرمين: ماهوا دا اللي انا عايزاكو فيه
سـلمى: ها في ايه
نرمين: بصو يابنات .. السبت عيد ميلاد احمد مش كدا
سـهام وسـلمى بصو لبعض وكانوا ناسين ..
سـهام: اه صح تصدقي
نرمين: طيب انا قلت اقلقوا عليا شويه وادي انهردا الاربع وبكرا عندو شغل والسبت كمان عندو شغل ايه رأيكو نعمل عيد ميلادو الجمعه؟
سـلمى: الله على افكااااارك .. طب تمام بس فين وامتى وازاي
سـهام: طب استني انتي هتفضلي من انهردا لحد الجمعه مش بتردي عليه؟
نرمين: ااه بس ونبي دا بيني وبينكم وانا قلت لماما وفهمتها عشان لو جه تقوللو اني تعبانه ونايمه ومش هقدر اشوفه
سـلمى: اه يامجنونه طب ماشي بس حرام عليكي والله الواد قلقان عليكي اوي
نرمين: مانا هفرحوا يوم الجمعه بأه
واتفقوا امتى وفين وازاي هيعملوا العيد ميلاد
تاني يوم
احمد في الشغل قاعد مش على بعضو ومش عارف يركز في حاجه
قام واتصل كذا مره بنرمين على البيت وعلى الموبايل مش بترد
فضل يلف كتير حوالين نفسه لحد ما قرر يسيب الشغل ساعة زمن يروح فيها لنرمين البيت ويرجع
خد عربيته وراح جري على بيت نرمين
فضل يرن الجرس كتير لحد ما في الاخر وهوا ماشي اتفتح الباب
ام نرمين: اهلا يابني اتفضل معلش كنت نايمه
احمد: انا اسف ياحماتي جيت قلقت نومك معلش بس انا قلقان على نرمين جدا هيا فين
ام نرمين: طب اتفضل ادخل
دخل احمد وقعد وام نرمين دخلت عليها الاوضه
ام نرمين: نرمين اقولو ايه يابنتي
نرمين: قوليلو زي ما اتفقنا يا ماما اني تعبانه ونايمه ومن امبارح تعبانه عالسرير مش بتحرك والموبايل محطوط سايلنت وفي اوضتك
ام نرمين: حاضر يامجنونه
ام نرمين طلعت من الاوضه وراحت لاحمد
احمد: ها يا طنط ارجوكي طمنيني عليها انا بقالي من امبارح بكلمها مش بترد وانهردا سبت الشغل وجيت مش عارف في ايه والله هتجنن
ام نرمين: والله ما عارفه اقولك ايه يابني
احمد: يعني ايه !!؟ في ايه!
ام نرمين: نرمين تعبانه جدا من امبارح والموبايل بتاعها محطوط سايلنت وعندي في الاوضه وهيا تصحى من هنا وتنام تاني مش بتتحرك من على السرير
احمد: ايه!!!!!! عندها ايه طيب
ام نرمين: والله يابني ما عارفه
احمد: طب خليني ادخل عليها وانزلها للدكتور ولا اجيبلها دكتور هنا في البيت
ام نرمين: لالا يابني هيا كويسه هما شوية زكام وبرد بس شديد شويه ولو تعبت اكتر هكلمك متقلقش
احمد: طب اسمحيلي ادخل اطمن عليها ارجوكي
ام نرمين: والله هيا نايمه لسه داخله عليها دلوقتي لقيتها ياحبت عيني نايمه ومش حاسه بحاجه
احمد: استغفر الله العظيم يارب الف سلامه عليها ياطنط
ام نرمين: الله يسلمك يابني
احمد رن موبايله وكان تليفون من الشغل واضطر يستأذن عشان عندو شغل كتير وقالها انو هيجي تاني بليل يطمن على نرمين
اول ما احمد مشي طلعت نرمين جري وهيا مبسوطه اوي ان احمد قلقان عليها كل القلق دا وفي نفس الوقت ان خطتها ماشيه تمام اوي
ام نرمين: بعد كدا مش هكدب عشانك تاني يابت انتي يامجنونه
نرمين: ههههههه خلاص ياماما اول واخر مره
نرمين فضلت باصه على احمد من الشباك لحد ما اتطمنت انو مشي من الشارع خالص
كلمت سـلمى ونزلت معاها هيا وسـهام راحوا يختارولو هدايا ..
عدى اليوم بسرعه عالكل الا على احمد اللي كان عندو كم شغل كتير جدا ومش عارف يهرب منو ويروح لنرمين
خلص شغله الساعه 12 بليل ورجع البيت تعباااااان ومش قادر يفتح عينه واتكسف يروح لبيت نرمين في وقت متأخر زي دا
تاني يوم صحى صلى صلاة الجمعه مع باباه في الجامع ورجع اتغدوا ..
على الغدا ..
سـهام: احمد بقولك ايه
احمد: قولي
سـهام: عايزينك انا وسـلمى في مشوار مهم جدا انهردا
احمد: على فين
سـلمى: هنقولك لما ننزل
احمد: مش فاضي لدلعكوا انا .. انا لازم اروح اطمن على نرمين
سـهام: احمد والله هيا ساعه بس والله مشوار مهم جداااااا جدا مينفعش يتأجل خلص وروحنا وانزل لنرمين
احمد: طيب يابنات امتى
سـلمى بصت لسـهام بعدين بصت لاحمد: على 7
احمد: ماشي تكونو جاهزين من قبلها بساعه عشان منتأخرش
سـهام: خلاص ماشي
الساعه 6 ونص نرمين اتصلت بسـلمى وقالتلها انها وصلت المكان اللي اتفقوا عليه ومعاها الهدايا واصحاب احمد كلهم موجودين وكمال وكريم هناك والكل مستني
سـلمى قفلت مع نرمين وكانت جاهزه هيا وسـهام وراحوا خبطوا على باب احمد وقالولو انهم جاهزين
نزلو التلاته العربيه ووصفولو البنات المكان وهوا كان ماشي زي ماهما بيوصفولو
اول ماوصلوا كان قدام كافيه
احمد: ممكن افهم جايين كافيه نعمل ايه! والدنيا ضلمه اصلا جوا وشكلو مقفول
سـلمى من تحت لتحت رنت على نرمين عشان تفهم انهم وصلوا
سـهام: تعالى انزل بس
احمد: في ايه انتو معطلينني على فكره
سـهام وسـلمة خدوه من ايديه ودخلوه الكافيه اول ما دخلوا النور اتفتح والكل بأه بيغنيلو اغنيه ال birthday
احمد بأه مش فاهم حاجه .. جت نرمين من وراه وهمست فـ ودنو بحبك
لف لقى نرمين بصلها وهوا لسه مستغرب ومش فاهم حاجه
سـلمى وسـهام بصوا عليه وضحكوا
احمد: نرمين؟؟؟؟؟؟؟
نرمين: عنيا؟
احمد: لا قصدي انتي مش عيانه في البيت؟
نرمين: انا عملت عليك الفيلم الهندي دا كلو عشان اللي احنا فيه دلوقتي دا
سـهام: واحنا كنا معاها في الفيلم دا وكمان مامتها
نرمين: كل سنه وانتا طيب ياحبيبي
احمد: يامجانيــــــــــــن!!!!!
نرمين: مش لوحدك مجنون يااحمد فاكر يوم ماخطبتني؟ هههههههه
احمد: هههههههه ماشي مردودالكو كلكو
قضوا وقت جميل وكانت حفله لذيذه خلصت وطلع احمد ونرمين وسـهام وسـلمى وكريم وكمال على مطعم مفتوح في الهوا
وقعدوا كلهم يتعشوا ..
خلصوا العشا واحمد خد نرمين وصلها على بيتها وكمال وكريم روحوا البيت وسـهام وسـلمى كانوا مع احمد وكلهم روحوا على بيتهم
فاتت الايام وجه يوم الخميس .. انهردا فرح سـهام وسـلمى
الاتنين كانوا احلى من بعض
وكل واحده فيهم ماسكه ايد التانيه وهما في الكوافير وقلقانين وقلوبهم بتدق بسرعه اوي
خلصوا وطلعوا لقيوا الكل مستنيهم
اول لما طلعوا سمعوا زغاريط كتير .. وكمال وكريم كانوا مستنينهم في البدايه اول لما شافوهم راحوا كل واحد مسك ايد عروسته
كريم وكمال اول لما شافوهم قلوبهم دقت جامد اوي .. واخيرا حلمهم هيتحقق انهردا
كمال مسك ايد سـهام وهمس في ودنها .. بحبك يااجمل وارق انسانه في الدنيا
سـهام بصتلوا وابتسمت
كريم بص لسـلمى: ايه القمر اللي انا شايفه دا
سـلمى بصت في الارض واتكسفت
ركبوا العربيات واتزفوا لحد ماوصلوا للقاعه وكانت متحضره لعروتين وكوشتين مش عروسه واحده وكوشه واحده
كانت اجمل ليله في ايام عمرهم كلهم .. كلهم كانوا مبسوطين
وجه احمد وقالهم يلا هنتصور
الكل وقف .. احمد ومعاه نرمين .. كمال وجنبو سـهام .. كريم وجنبو سـلمى
ابو وام سـلمى وسـهام واحمد .. ام نرمين واختها نسرين وجوز نسرين .. ام كمال وام كريم واختو هاله ..
نسرين: ثواني ثواني
المصور: ايوا يا مدام
نسرين: حنين فين
كلهم بصوا لقوا جنين واقفه بتلعب نسرين خدتها وراحت على عندهم
وقفوا كلهم واتصوروا الصوره اللي هتفضل دايما محفوره في قلوبهم كلهم
النهـــــــــــــــايه :)
جميييييييييييييييييييييلة
ردحذفسما
مرسي ياسما انتي اللي جميله ربنا يخليكي منوره :)
حذفانتى انسانة جميلة جدا و القصة جامدة جدا و كنت مبسوطة و انا بقرأها لدرجة عنيا و الله كانت بتدمع و بتمنالك التوفيق و النجاح فى حياتك يا رب و يرزقك ابن الحلال و الى الاحسن دايما يا رب
ردحذفالله يكرمك ياقمر تسلميلي يارب انا وانتي ياااارب :)
ردحذفتحفه اخر حاجه بجد
ردحذففيروز
جامده يا قمر
ردحذفعدنان
رووووووووووووووووووووووووووووووووووووووووووووووووووووعه
ردحذف